Dili, 24/11/2022, Hafoin remata site visit iha terrenu, ohin ekipa Tékknika Aprovizionamentu hamutuk ho Tékniku hosi Diresaun Enjeñaria no Investimentu (DEI) Bee Timor-Leste, Empreza Públika (BTL, E.P) hala’o prebid meeting ho kompañia sira kona-bá projetu Konstrusaun Sistema Bee Moos no Supply & Installation of Prefabricated Liner Tanks ba iha postu-administrativu Ba’aguia, munisípiu Baucau.
Prebid meeting ne’e, hodi ko’alia kona-bá kontinuasaun hosi siste visit no faze ou prosesu sira tuir mai relasiona ho projetu Konstrusaun Sistema Bee Moos no Supply & Installation of Prefabricated Liner Tanks ne’ebé sei implementa iha postu-administrativu Ba’aguia.
Atividade site visit no prebid meeting ne’e, hanesan mandatória iha dokumentu konkursu ba projetu konstrusaun no melloramentu sira no prosesu tuir mai molok implementa projetu hirak ne’e.
Sistema bee ne’ebé sei implementa iha postu-administrativu refere, sei transforma ba sistema urbana, nune’e bele instala mos metru kontadór ba uma kain ida-idak nomos sei instala mos torneira públika. Entretantu liner tanks ne’ebé monta iha fatin hirak ne’e hamutuk hitu (7), ho nia kapasidade ne’ebé la hanesan, liner tank ho nia kapasidade metru kúbiku 170 (170m3) iha ida, kapasidade metru kúbiku 70 (70m3) iha lima (5) no ida seluk ho nia kapasidade metru kúbliku 25 (25m3).
Enkuantu projetu Konstrusaun Sistema Bee Moos no Supply & Installation of Prefabricated Liner Tanks ne’ebé sei benefisia ba suku tolu hanesan, suku Hae-Coni, Alawa-Kraik no Alawa-Leten inklui komunidade hosi suku sira seluk ne’ebé hela iha postu-administrativu Ba’aguia Villa, munisípiu Baucau. No sei fornese mos bee ba fasilidade públika sira hanesan postu saúde, eskola, postu eskuadra polísia nian, igreja no edifísiu administrasaun P.A Ba’aguia.
Alende ne’e, iha parte lokraik, ekipa Aprovizionamentu no DEI kontinua hala’o prebid meeting ho kompañia sira kona-bá projetu Melloramentu Sistema Fornesimentu Bee Moos, iha postu-administrativu Letefoho, munisípiu Ermera 1 no 2 inklui Supply & Installation of Prefabricated Liner Tanks ba iha postu-administrativu Letefoho, munisípiu Ermera.
Projetu Melloramentu Sistema Fornesimentu Bee Moos ne’e, sei benefisia ba komunidade sira iha suku tolu (3) hanesan suku Catrai-Kraik, Docurai no Haupu, alende ne’e sei fornese mos bee ba postu saúde, eskola, igreja, postu eskuadra polísia no edifísiu administrasaun P.A Letefoho.
Enkuantu Sistema bee ne’ebé sei implementa iha postu-administrativu refere, sei transforma ba sistema urbana, nune’e hodi instala mos metru kontadór ba uma kain ida-idak.
Share on Social Media:
