Ermera, 20/11/2022, Tékniku Operadór (T.O), Bee Timor-Leste, Empreza Públika (BTL, E.P) munisípiu Ermera, normaliza kanu transmisaun bee 6" ne’ebé liga ba Estasaun Tratamentu Bee (ETA, sigla portugés), Riheu kotu, iha área Nunutali, suku Humboe, munisípiu Ermera.
Tuir informasaun hosi terrenu katak, kanu transmisaun ne’ebé kotu ne’e, kauza hosi ai tohar, nune’e rezulta kanu kotu, ho estragus ne’e, afeta direta sirkulasaun bee bá ETA Riheu, nune’e bee la tama ba sistema, hodi prejudika fornesimentu bee ba komunidade sira iha Gleno labele asesu ba bee moos.
Hafoin identifika estragus ne’e, tékniku operadór sira mobiliza kedas materiál, hodi halo intervensaun nune’e bele garante abastesimentu bee ba konsumidór sira iha Gleno.
Tuir informasaun hosi BTL, E.P Ermera katak, ohin konsege solda hotu no atividade normalizasaun ne’e remata ona, hahú kedas hosi intake mota kiik no mota boot to’o ETA Riheu. Alende ne’e, tékniku operadór sira koko loke kedas bee, hodi distribuisaun liuhosi kanu transmisaun refere, nune’e bele haree kondisaun kanu ne’e, maibé hafoin koko loke bee, sirkulasaun bee liuhosi kanu ne’e ba rezervatóriu Riheu, la’o normál fila-fali no kliente sira mos bele asesu hikas ba bee moos.
Share on Social Media:
