Díli, 10/01/2025. Prezidente Komisaun Ezekutiva (KE) Bee Timor-Leste, Empreza Públika (BTL, E.P) Sr. Gustavo da Cruz, akompaña hosi Koordenadór BTL, E.P munisípiu Covalima enkontru ho S.E Sekretáriu Estadu Eletrisidade, Bee no Saneamentu (SEEAS,sigla portugés) Sr. Santo Noronha, Prezidente Konsellu Administrasaun EDTL, E.P ho ekipa DNRAS inklui Plataforma Nasionál BESI Timor-Leste (PN-BESI-TL), Reuniaun ne’e realiza iha salaun enkontru SEEAS, Caicoli.
Reunaiun ne’e, hodi ko’alia kona-bá problema falta bee moos ne’ebé populasaun sira iha suku Ogues, postu-administrativu Maucatar no suku Maudemo, postu-administrativu Tilomar, munisípiu Covamila enfrenta, nune’e hodi buka solusaun atu responde ba problema refere.
Durante iha enkontru ne’e, parte tékniku hosi SEEAS nian halo mos aprezentasaun kona-bá rezultadu identifikasaun ba problema bee moos iha suku Ogues no suku Maudemo nian, hafoin hodi kontinua halo diskusaun, oinsá buka alternativa atu responde ba problema ne’ebé komunidade sira enfrenta ne’e.
Durante iha diskusaun ne’e, Ezekutivu BTL, E.P hatete, sistema bee mos ba PA Maucatar no Postu Tilomar nian, antes ne’e, ekipa BTL, E.P halo ona levantamentu tékniku no seidauk bele implementa, tanba afeta hosi redusaun orsamentu iha tinan kotuk nian, maibé agora anota hela hodi bele kontinua fali. Maibé atu responde imediatu ba problema ne’e, BTL, E.P sei organiza hodi instala bomba bee, nune’e provizoriamente bele hatan ba komunidade sira-nia preokupasaun, nune'e hodi hein konstrusaun sistema bee moos ba longu prazu nian.
Relasiona ho sistema bee moos ba PA rua no fatin sira seluk, ne’ebé antes ne’e halo ona levantamentu tékniku iha tinan rua liu ba, S.E SEEAS rekomenda ba BTL, E.P atu halo fila-fali levantamentu tékniku no BOQ nune'e bele apar ba situasaun atuál nian, nune'e halo revizaun ba kustu, molok kontinua ba faze tuir mai.
Iha biban ne’e, S.E SEEAS informa mos katak, iha tempu besik, ekipa konjunta kompostu hosi SEEAS, BTL, E.P, EDTL, E.P, DNRAS ne’ebé sei lidera hosi S.E SEEAS sei tun ba munisípiu sira, hodi observa no rona direta komunidade sira-nia preokupasaun kona-bá bee moos no eletrisidade.
Share on Social Media:
