Díli, 01/10/2025, Vise-Prezidente Komisaun Ezekutiva (KE) Bee Timor-Leste, Empreza Públika (BTL, E.P) ba Asuntu Tékniku, Sr. José Filipe Ximenes Smith ho Vise-Prezidente KE BTL, E.P ba Asuntu Korporativu, Sr. Manuel Tomás Amaral de Carvalho, akompaña hosi Diretór O&M no Jestór Distribuisaun BTL, E.P ho ekipa enkontru ho Lideransa Komunitária suku Becora nomos PNTL Eskuadra Cristo Rei, hodi rona populasaun suku Becora sira-nia preokupasaun kona-bá problema falta bee moos. Reuniaun ne’e hala’o iha sede suku Becora, Postu-administrasaun Cristo Rei, munisípiu Díli.
Iha sorumutu ne’e, xefe suku Becora no xefe aldeia inklui delegada sira informa kona-bá problema sosiál ne’ebé durante ne’e komunidade sira enfrenta, liu-liu liga ba falta bee moos, ho nune’e liuhosi sorumutu ne’e, hodi hato’o ba BTL, E.P oinsá bele buka alternativa hodi responde ba populasaun sira-nia halerik ne’e.
Hafoin rona tiha informasaun hosi lideransa suku, Ezekutivu BTL, E.P hatete, BTL, E.P rekoñese, problema falta bee moos, tanba projetu alargamentu estrada, nune’e afeta direta ba sistema kanalizasaun bee nian, tanba ne’e BTL, E.P seidauk bele halo intervensaun imediatu, maibé sei hein konstrusaun estrada ne’e finaliza, tékniku BTL, E.P sei halo melloramentu ba sistema nune’e hodi halo ligasaun ba konsumidór sira.
Ezekutivu BTL, E.P akresenta, alen de obra alargamentu estrada, kauza ida seluk ne’ebé perturba populasaun sira labele asesu bee mak koneksaun ilegál. Tanba tékniku BTL, E.P identifika ona katak, iha komunidade balun iha parte Becora no Camea halo koneksaun ilegál direta ba kanu transmisaun no distribuisaun inklui uza sanyo hodi dada/xupa bee direta ba sistema kanalizasaun públika, nune’e presaun bee kiik, hodi rezulta bee ba tanke rezervatóriu menus no konsumidór sira labele hetan bee ho di’ak.
Liga ba ligasaun ilegál ne’e, Vise-Prezidente KE BTL, E.P ba Asuntu Tékniku informa, iha tempu besik, tékniku BTL, E.P sei tun ba terrenu hodi desliga koneksaun ilegál hirak ne’e no solisita ba autoridade lokál nomos parte PNTL Eskuadra Postu Cristo Rei, atu apoia ekipa BTL, E.P, durante hala’o servisu iha terrenu.
Maibé, atu responde imediatamente ba populasaun sira-nia halerik ne’e, ohin, BTL, E.P koordena ona ho lideransa suku Becora, atu identifika fatin hodi instala tanke profil provizóriu, nune’e bele enxe bee, hodi fasilita komunidade sira bele asesu bee ba nesesidade lor-loron nian, hodi hein projetu melloramentu ba sistema kanalizasaun bee, iha área referida
Share on Social Media:
