Díli, 16/09/2022, Diretór Diresaun Operasionál no Manutensaun (D.O.M) Bee Timor-Leste, Empreza Públika (BTL, E.P), Sr. João N. Piedade Bráz akompaña hosi Jestór D.O.M hamutuk ho ekipa hosi Departamentu Apoiu Kliente (D.A.K), Departamentu Kontrolu Kualidade no Ambiente (DCQA sigla portugés), ekipa Task Force (T.F) hala’o enkontru ho JICA, iha edifísiu D.O.M BTL, E.P, Caicoli, Díli.
Objetivu hosi enkontru ne’e, hodi ko’alia kona-bá planu ne’ebé mak prepara ona, hodi hili área pilotu ida, iha tempu badak ekipa sei tun ba terrenu, hodi dezliga koneksaun ilegál sira ne’ebé durante ne’e, komunidade sira halo.
Ofisiál Apoiu Kliente BTL, E.P informa, molok ekipa tun ba dezliga koneksaun bee ilegál hirak ne’e, ekipa sira sei hala’o uluk aproximasaun no vijilánsia, atu haree komunidade sira nia bee nomos sistema bee karik iha ligasaun ilegál ruma, ekipa sei hato’o kedas notifikasaun ba komunidade sira ne’ebé komete aktu ne’e, wainhira la kumpri notifikasaun mak ekipa konjuta hosi D.O.M BTL, E.P sei tun ba terrenu hodi dezliga koneksaun iha konsumidór nia fatin.
Ofisiál akresenta, aktu koneksaun bee ilegál no uza mákina (sanyo) hodi dada bee ne’e, prejudika ema seluk labele hetan bee, tamba hamenus presaun bee, nune’e bee labele sufisiente ba ema hotu. Tamba iha Diploma Ministeriál nú. 1/2009 11 de Fevereiro de 2009 ne’ebé ko’alia kona-bá Fiskalizasaun ba Sistema Abastesimentu Bee, sei la autoriza públiku hodi halo koneksaun bee ilegál no uza mákina (sanyo) hodi dada bee.
Alende ne’e, sei informa mos ba kliente sira ne’ebé asesu ona bee, ne’ebé kanaliza hosi BTL, E.P, atu hakbesik aan ba iha Balkaun BTL, E.P nian, hodi bele selu tarifa bee.
Share on Social Media:
