Díli, 30/05/2023. Prezidente Komisaun Ezekutiva (KE) Bee Timor-Leste, Empreza Públika (BTL, E.P), Eng. Carlos Peloi dos Reis hamutuk ho Vise-Prezidente KE BTL, E.P ba Asuntu Bee, Saneamentu no Drenajen, Sr. Gustavo da Cruz, akompaña hosi Diretór DEI, Jestór RP & GIS ho Project Management Unit-PMU BTL, E.P nian, hala’o enkontru koordenasaun estratéjiku daruak ho Parseiru Dezenvolvimentu sira, iha salaun enkontru edifísiu sentrál BTL, E.P, Caicoli, Díli.
Objetivu hosi enkontru koordenasaun daruak ne’e, hodi atualiza progresu kona-bá preparasaun sira ba Projetu Abastesimentu Bee no Saneamentu (Water Supply and Sanitation Project), iha kapitál munisípiu haat hanesan, munisípiu Baucau, Lautém, Viqueque no Manufahi, Projetu Abastesimentu Bee ba Díli Leste no Díli Oeste (Dili East and West Water Supply Project), Projetu Melloramentu Bee, Saneamentu no Drenajen ne’ebé finansia hosi MCC ou Dili WSD Improvement Project (MCC) nomos Projetu DED ba munisípiu neen hanesan, munisípiu Aileu, Ermera, Liquiça, Ainaro, Bobonaro no Covalima, inklui kestaun seluk ba parseiru espesiál sira.
Durante iha reuniaun ne’e, parte PMU BTL, E.P halo mos aprezentasaun kona-bá prosesu sira ba Projetu WSP, DEWWS & WSD ne’ebé sei implementa iha kapitál Díli no munisípiu 10 seluk ne’ebé mensiona ona iha leten. Atu nune’e Parseiru Dezenvolvimentu sira bele hatene prosesu hirak ne’e to’o ona iha ne’ebé no ninia kontinuasaun sira tuir mai, molok hakat ba faze implementasaun nian.
Entidade sira ne’ebé mak partisipa iha enkontru koordenasaun daruak ne’e, mai hosi Parseiru Dezenvolvimentu sira hanesan World Bank Country Representantive Timor-Leste East Asia and Pacific Region ho ekipa, reprezentante hosi Japan International Cooperation Agency-JICA, parte Millennium Challenge Corporation-MCC nian, ekipa Asian Development Bank-ADB no ekipa Department of Foreign Affairs and Trade-DFAT. Nune’e mos hosi parte Ajénsia Dezenvolvimentu Nasionál, Institutu Públiku-ADN, I.P, Diretór Ezekutivu Compact Development Team Timor-Leste (CDT-TL) ho ekipa, National Director for Spatial Planning-MPO & PPI-EIB Focal Point no ekipa, parte Ministériu Obras Públikas (MOP) nomos ekipa hosi Autoridade Nasionál Lisensiamentu Ambientál, Institutu Públiku (ANLA, I.P).
Share on Social Media:
