Díli, 04/09/2024. Diretór Operasasaun no Manutensaun (DOM) ho Bee Timor-Leste, Empreza Públika (BTL, E.P), hamutuk ho parte Legál, Jestór DAK ho ekipa no parseiru JICA inklui DNRAS disemina informasaun kona-bá Dekretu Lei no Diploma Ministeriál BTL, E.P nian, ba abitante sira, iha aldeia Postu-Penál no São José Aimutin, Postu-Administrativu Dom Aleixo, munisípiu Díli.
Ekipa BTL, E.P halo sosializasaun kona-bá Dekretu Lei nú. 41/2020 loron 25 fulan Setembru ne’ebé ko’alia kona-bá “Kriasaun Bee Timor-Leste, Empreza Públika (BTL, E.P), Dekretu Lei nú. 4/2004 loron 11 fulan Fevereiru, kona-bá “Aprova Rejime Fornesimentu Bee ba Konsumu Públiku”, nune’e mos Diploma Ministeriál nú. 1/2004 loron 11 fulan Fevereiru ne’ebé ko’alia kona-bá “Tabela Tarifária” no ikus liu Diploma Ministeriál nú. 1/2009 loron 5 fulan Outubru, kona-bá “Fiskalizasaun Sistema Abastesimentu Bee”.
Objetivu hosi atividade diseminasaun ne’e, hodi partilla informasaun kona-bá, regulamentu hotu ba konsumidór sira ne'ebé sei sai kliente BTl, E.P, atu sira bele hatene regras, nune’e sira labele viola dekretu lei no diploma ministeriál ne’ebé mak eziste ona, liu-liu kona-bá proibisaun halo koneksaun bee ho dalan ilegál ba sistema sira, tau matan ba sistema ne’ebé instala ona nomos oinsá atu bele selu tarifa bee moos nian.
Durante iha atividade sosializasaun ne’e, BTL, E.P husu ba abitante sira atu rejista, nune'e tékniku BTL, E.P nian bele tun ba terrenu hodi halo ligasaun liuhosi sistema foun ne'ebé foin instala. Alen de ne'e, wainhira sistema ne'ebé instala ona no balun sei instala tan iha aldeia no suku refere, husu atu kuida kanu no labele halo koneksaun ilegál diretamente ba kanu transmisaun no distribuisaun sira, inklui labele estraga sistema bee sira seluk ne'ebé iha ona.
Iha okaziaun ne'e, Administradór Postu-Administrativu no xefe aldeia husu ba komunidade atu koopera ho BTL, E.P hodi bá rejista iha balkaun BTL, E.P nian, nune'e bele dada bee ba ida-idak nia uma.
Partisipa iha atividade sosializasaun ne’e mak Autoridade Postu, Xefe suku, Xefe Aldeia nomos komunidade hosi Postu-Penál no São José Aimutin
Share on Social Media:
