𝐁𝐚𝐮𝐜𝐚𝐮, 𝟐𝟔 𝐌𝐚𝐫𝐬𝐮 𝟐𝟎𝟐𝟔. Vise-Prezidente Komisaun Ezekutiva (KE) BTL, E.P ba Asuntu Tékniku, José Filipe Ximenes Smith ho Vise-Prezidente KE BTL, E.P ba Asuntu Korporativu, Manuel Tomas Amaral de Carvalho hamutuk ho Diretór DOM, Aleixo dos Santos, Jestór DAK no Ofisiál Legál, akompaña hosi Koordenadora BTL, .EP Munisípiu Baucau ho ekipa, sosializa regulamentu ne’ebé abrigu iha Dekretu Lei no Diploma Ministeriál sira kona-bá tabela tarifária, proibisaun ba koneksaun ilegál no kritéria atu sai kliente BTL, E.P nian ba komunidade sira, iha Postu-administrativu Laga, Munisípiu Baucau.
Iha atividade sosializasaun ne’e, BTL, E.P partilla informasaun detalla Dekretu Lei nú. 41/2020 loron 25 fulan Setembru ne’ebé ko’alia kona-bá “Kriasaun Bee Timor-Leste, Empreza Públika (BTL, E.P), Dekretu Lei nú. 4/2004 loron 11 fulan Fevereiru, kona-bá “Aprova Rejime Fornesimentu Bee ba Konsumu Públiku”, nune’e mos Diploma Ministeriál nú. 1/2004 loron 11 fulan Fevereiru ne’ebé ko’alia kona-bá “Tabela Tarifária” no ikus liu Diploma Ministeriál nú. 1/2009 loron 5 fulan Outubru, kona-bá “Fiskalizasaun Sistema Abastesimentu Bee”.
Realizasaun atividade sosializasaun ne’e ho objetivu, hodi partilla uluk informasaun kona-bá, knaar BTL, E.P nian no regulamentu sira ne’ebé sita ona iha leten ba abitante sira, atu nune’e sira bele entende, molok prepara ba inaugurasaun projetu melloramentu sistema kanalizasaun bee no instalasaun tanke rezervatóriu, iha PA Laga.
Iha abertura, Administradór Postu-administrativu Laga hatete prezensa BTL, E.P nian iha fatin ida ne’e, atu fahe informasaun liga ba projetu sistema bee moos ne’ebé implementa ona iha Postu Laga, hodi esplika lala’ok jestaun sistema bee ne’e iha futuru, hafoin kompañia entrega projetu nee ba BTL, E.P.
APA Laga informa, maske projetu melloramentu sistema fornesimentu bee no instalasaun tanke rezervatóriu ne’e, kompañia seidauk entrega ba BTL, E.P nomos seidauk inaugura, maibé komunidade balun hahú asesu ona bee hosi sistema kanalizasaun refere, maske komunidade balun seidauk hetan bee ho di’ak. Ho nune’e, APA Laga husu ba komunidade sira, wainhira iha dúvida ou preokupasaun no sujestaun ruma ne’ebé konstrutivu, bele hato’o direta ba parte BTL, E.P, perante sosializasaun refere.
Vise-Prezidente KE BTL, E.P ba Asuntu Tékniku hatete, importánsia sorumutu ida ne’e, atu esplika kona-bá prosedimentu sira, liu-liu dever, direitu no responsabilidade nudár kliente nian, atu nune’e komunidade sira bele entende didi’ak regra sira, molok sai na’in ba sistema kanalizasaun bee.
Vise-Prezidente KE BTL, E.P ba Asuntu Tékniku esplika prosesu kanalizasaun bee hosi bee matan to’o iha komunidade nia fatin la fásil no todan tebes, tanba sei liuhosi prosesu tékniku no administrativu lubuk ida hanesan, levantamentu tékniku, prepara dezeñu, prosesu aprovizionamentu mak konkursu públiku, site visit no prebid meeting, hafoin ba faze implementasaun nian, molok dada bee to’o iha konsumidór idak-idak nia uma. Ho nune’e, husu ba komunidade Laga, atu tau matan ba fasildiade bee nian ne’ebé instala ona iha idak-idak nia fatin, atu nune’e labele sai aat no bele uza ba tempu naruk.
Alende ne’e, Ezekutivu rekomenda ba abitante sira, wainhira asesu ona bee, tenke uza tuir konsiénsia, atu nune’e konsumidór sira seluk mos bele hetan bee hanesan.
Durante iha atividade sosializasaun ne’e, lideransa suku no komunidade sira hato’o sira-nia preokupasaun sira kona-bá kontrolu bee, presaun bee kiik, prosesu atu selu tarifa bee, preokupasaun sira seluk, inklui hato’o rekomendasaun no susjestaun balun.
Hatan ba preokupasaun hirak ne’e, Vise-Prezidente KE BTL, E.P ba Asuntu Korporativu hatete, projetu nee wainhira inaugura BTL, E.P sei kontrola, halo operasaun no distribuisaun bee moos ba komunidade sira. Alende ne’e, Ezekutivu ne’e, husu ba komunidade sira atu jere bee ho di’ak, nune’e labele gastu maka’as, maibé wainhira komunidade sira la kontrola bee no husik bee sulin estraga, mak kliente sira sei selu ho kustu ne’ebé boot.
Vise-Prezidente KE BTL, E.P ba Asuntu Korporativu rekomenda ba Autoridade lokál, Veteranu sira lideransa komunitária no komunidade sira, hotu-hotu iha responsabilidade morál, hodi haree no kuida infraestrutura ne’ebé iha, atu nune’e labele fó vítima ba ema seluk. Kontribuisaun parte hotu hamutuk ho BTL, E.P hodi kontrola sistema bee, nune’e bele garante efisiensia no efetividade.
Vise-Prezidente KE BTL, E.P ba Asuntu Korporativu destake mos gastu fulan-fulan ba sistema perfurasaun ou bomba sira boot tebes, ekivalente ho pagamentu tarifa bee hosi kliente sira la sufisiente. Tanba ne’e, rekomenda ba Autoridade lokál, Veteranu sira lideransa komunitária no komunidade sira, hotu-hotu iha responsabilidade morál, hodi haree no kuida infraestrutura ne’ebé iha labele estraga sistema kanalzasaun sira, atu nune’e labele fó vítima ba ema seluk. Kontribuisaun parte hotu hamutuk ho BTL, E.P hodi kontrola sistema bee, nune’e bele garante efisiensia no efetividade.
Iha oportunu ne’e, Diretór DOM hatete, realizasaun atividade sosializasaun ne’e, la’os de’it iha PA Laga, maibé ekipa BTL, E.P Baucau sei foti dadus kliente no sei kontinua halo mini sosializasaun iha bairo sira, nune’e kliente sira seluk ne’ebé ohin la marka prezensa bele entende regulamentu sira.
Durante iha sosializasaun ne'e, Jestór DAK esplika detalla ba komunidade sira kona-bá utilizasaun metru kontadór no prosesu rekolla tarifa bee, wainhira parte DAK tun ba lee metru kontadór, kliente sira iha dever no obrigasaun atu hahú selu tarifa bee fulan-fulan.
Enkuantu persentajen projetu melloramentu sistema fornesimentu bee moos no instalasaun tanke rezervatóriu ne'ebé implementa iha PA Laga, daudaun ne'e, atinji ona 97% no obra refere sei kobre suku Soba no Samalari, multi aldeia. Sistema bee moos ne'e sei benefisia ba komunidade uma kain 305 ho totál populasaun 1.764, iha Laga.
Partisipa iha atividade sosializasaun ne’e, Administradór Postu-administrativu Laga, lideransa komunitária, SMASA no komunidade PA Laga.
Share on Social Media:
