Díli, 05/12/2024. Vise-Prezidente Komisaun Ezekutiva (KE) Bee Timor-Leste, Empreza Públika (BTL, E.P) ba Asuntu Tékniku, Sr. José Filipe Ximenes Smith, akompaña hosi Diretór Operasasaun no Manutensaun (DOM) ho Diretór Enjeñaria no Investimentu (DEI), Jestór, Jestór DAK Jestór Infraestrutura ho ekipa inklui parseiru JICA no DNRAS disemina informasaun kona-bá Dekretu Lei no Diploma Ministeriál BTL, E.P nian, ba abitante suku Becora no Camea, postu-administrativu Cristo Rei, munisípiu Díli. Atividade sosiazaun ne’e rasik, realiza iha salaun enkontru, edifísiu PNTL eskuadra Cristo Rei.
Ekipa BTL, E.P halo sosializasaun kona-bá Dekretu Lei nú. 41/2020 loron 25 fulan Setembru ne’ebé ko’alia kona-bá “Kriasaun Bee Timor-Leste, Empreza Públika (BTL, E.P), Dekretu Lei nú. 4/2004 loron 11 fulan Fevereiru, kona-bá “Aprova Rejime Fornesimentu Bee ba Konsumu Públiku”, nune’e mos Diploma Ministeriál nú. 1/2004 loron 11 fulan Fevereiru ne’ebé ko’alia kona-bá “Tabela Tarifária” no ikus liu Diploma Ministeriál nú. 1/2009 loron 5 fulan Outubru, kona-bá “Fiskalizasaun Sistema Abastesimentu Bee”.
Objetivu hosi atividade diseminasaun ne’e, hodi partilla informasaun kona-bá, ezisténsia no papel BTL, E.P nian, regulamentu hotu ba konsumidór sira ne'ebé sei sai kliente BTL, E.P, atu sira bele hatene regras, nune’e sira labele viola dekretu lei no diploma ministeriál ne’ebé mak eziste ona, liu-liu kona-bá proibisaun halo koneksaun bee ho dalan ilegál ba sistema sira, tau matan ba sistema ne’ebé instala ona nomos oinsá atu bele selu tarifa bee moos nian, molok halo kanalizasaun ba uma sira.
Vise-Prezidente KE BTL, E.P ba Asuntu Tékniku hatete, ohin ekipa BTL, E.P hamutuk ho DNRAS mai hasoru malu ho komunidade sira iha Becora no Camea, hodi rona preokupasaun sira nomos esplika prosedimentu sira oinsá atu sai kliente ou sai na’in ba bee.
Vise-Prezidente KE BTL, E.P ba Asuntu Tékniku akresenta, hafoin atividade sosializasaun ne’e, iha tempu badak, ekipa BTL, E.P sei tun ba terrenu, atu halo melloramentu ba sistema bee iha Becora no Camea, hodi desliga hotu koneksaun ilegál sira, hafoin sei taka mos sistema tuan, hodi ativa fali sistema foun, nune’e komunidade sira sei asesu bee hosi sistema foun. Maibé, antes atu asesu ba sistema foun ne’e, komunidade sira presiza ba rejista iha balkaun BTL, E.P nian, hafoin mak tékniku sira sei tun ba terrenu, hodi halo ligasaun foun ba abitante sira-nia hela fatin no evita halo ligasaun ilegál ba sistema bee.
Tanba ne’e, Ezekutivu BTL, E.P husu ba Autoridade PA, lideransa suku no aldeia inklui komunidade sira, atu koopera ho BTL, E.P, nune’e tékniku sira tun ba halo melloramentu iha terrenu, labele iha intervensaun ruma hosi abitante sira. Alen de ne’e, wainhira komunidade sira rejista no halo ona ligasaun foun, husu atu kuida no labele estraga sistema bee ou fasilidade públiku hirak ne’e.
Iha biban ne’e, Administradór postu-administrativu Cristo Rei hatete, liga problema falta bee moos iha PA Cristo Rei, mak ohin BTL, E.P mai atu rona preokupasaun no esplika mos regra sira, tanba ne’e husu ba komunidade sira ne’ebé partispa iha atividade sosializasaun ne’e, atu rona ho didi’ak informasaun ne’ebé parte BTL, E.P no DNRAS hato’o, nune’e bele informa fila-fali ba komunidade sira seluk ne’ebé mak ohin, la marka prezensa iha atividade sosializasaun ne’e.
Molok atu remata sosializasaun ne’e, Autoridade PA Cristo Rei agradese ba BTL, E.P no DNRAS ne’ebé bele partilla ona informasaun sira, liu-liu esplikasaun kona-bá regras no matadalan ba komunidade sira, hein katak informasaun hirak ne’e bele tulun komunidade labele atu komete tan aktu koneksaun ilegál, nune’e ema hotu-hotu bele hetan bee moos hanesan iha futuru.
Durante iha atividade ne’e, abitante sira hato’o sira nia preokupasaun kona-bá problema falta bee moos, maibé sira agradese tanba BTL, E,P iha tempu besik bele asesu ona bee hosi sistema BTL, E.P nian, ho nune’e sira sei koopera hodi rejista no prontu atu kontribui reseitas ba Estadu, liuhosi selu tarifa bee moos, maibé sira husu ba BTL, E.P atu mantein halo kontrolu no operasaun ba sistema sira ne’e ho regularmente, ho nune’e sira labele halerik tan ba bee moos.
Partisipa iha atividade sosializasaun ne’e mak Administradór Postu-administrativu Cristo Rei, xefe suku no aldeia sira nomos komunidade hosi suku Becora no Camea.
Share on Social Media:
