Díli, 18/07/2023, Diretór Diresaun Operasional no Manutensaun BTL, E.P, Sr. Aleixo dos Santos, Diretór Diresaun Administrasaun no Finanças BTL, E.P, Sr. Sidonio Freitas, akompaña husi departamentu Apoiu Kliente no parte Legál, hamutuk ho Xefe Aldeia Fomento II, hala’o atividade diseminasaun ba dekretu lei no diploma ministerial, ba kliente sira, iha Aldeia Fomento II, Suku Comoro, Postu Administrativu Dom Aleixo.
Objetivu husi diseminasaun ne’e, atu partilla regras BTL, E.P, liu-liu kona-bá dekreitu lei no diploma ministeriál hanesan dekreitu lei nú. 41/2020 de 25 setembru kriasaun Bee Timor-Leste, Empreza Públika, dekreitu lei nú. 4/2004 de 11 fevereiru “aprova rejime fornesimentu bee ba konsumu públiku “diploma ministeriál nú. 1/2004 de 11 fevereiru “Tabela Tarifária “no diploma ministerial nú. 1/2009 de 5 outobru “Fiskalizasaun Sistema Abastesimentu Bee”
Iha atividade diseminasaun ne’e, Diretór Operasaun no Manutensaun, Sr. Aleixo dos Santos hatete, bee fonte importante ida , ne’ebé fo moris ba ema, bee maka hun hodi hatutan ema nia moris lolos, iha Timor-Leste.Durante ne’e iha kapitál Díli, liu-liu iha Díli oeste dependensia liu ba bee husi rai okos, ne’ebé governu halo perfurasaun bee, maka foin bele distribui bee ba komunidade sira, tamba ne’e ita hotu nia obrigasaun atu konserva bee no bele asesu bee tuir nesesidade, hodi labele estraga de’it bee.
Diretór Operasionál no Manutensaun ne’e afirma, Sosializasaun ida ne’e, nia objetivu maka hakarak partilla informasaun ba konsumidór no benefisiariu sira, hodi bele intende didi’ak prosesu hirak ne’e, wainhira asesu ona bee maka konsumidór iha dever atu bele kontribui selu tarifa bee moos ba estadu ida ne’e.
Diretór Diresaun Administrasaun no Finanças, Sidonio Fretas, husu ba partisipante sira hotu, atu kopera no kolabora ho BTL, E.P, hodi bele halo servisu ida, ne’ebé mudansa siknifikativu, liu-liu ba komunidade sira, ne’eb’e hela pertense ba Aldeia Fomento II, Suku Comoro.
Dirijente ne’e, husu ba konsumidór sira nia konsiensia tomak, atu labele halo ligasaun ilegál, labele uza makina elektronik hanesan Sanyo, nune’e labele kontribui hodi reduz presaun bee. Husu mos kliente sira, wainhira viziñu balun Prátika aktu halo ligasaun ilegál no uza sanyo hodi fura bee, ita bo’ot sira bele halo keixa ba BTL, E.P hodi bele halo intervensaun imediatu, nune’e bele fahe bee ba ema hotu.
Xefe Aldeia Fomento II, konsidera programa disemina informasaun ne’e, importante tebes, tamba ne’e Xefe Aldeia husu ba partisipante sira, hodi tranzmite informasaun ne’e, ba maluk sira seluk, ne’ebé la marka prezensa, hodi bele hatene lala’ok, oinsa bele asesu bee no selu tarifa bee moos.
Autoridade ne’e aafirma, hanesan autoridade lokál iha baze prontu servisu hamutuk ho BTL, E.P hodi bele halo kontrolu maxímu ba sistema kanalizasaun bee moos, ne’ebé sei fornese bee ba komunidade sira iha área ne’e.
Share on Social Media:
