Ermera, 13/01/2023, Ekipa BTL, E.P Nasionál hosi Diresaun Operasionál no Manutensaun (D.O.M) hosi Departamentu Apoiu Kliente no Departamentu jurídiku BTL, E.P, ne’ebé akompaña hosi BTL, E.P munisípiu Ermera, disemina informasaun kona-bá Dekretu Lei no Diploma Ministeriál BTL, E.P nian, ba komunidade, autoridade lokál, parte seguransa PNTL, igreja, reprezentante parseiru internasionál iha Ermera, sosiedade sivil no konvidadus sira seluk ne’ebé mak partisipa iha atividade sosializasaun refere. No atividade diseminasaun ne’e rasik realiza iha salaun enkontru Eis-PEMDA, Gleno, munisípiu Ermera.
Ekipa konjunta disemina informasaun kona-bá Dekretu Lei nú. 41/2020 loron 25 fulan Setembru ne’ebé ko’alia kona-bá “Kriasaun Bee Timor-Leste, Empreza Públika (BTL, E.P), Dekretu Lei nú. 4/2004 loron 11 fulan Fevereiru, kona-bá “Aprova Rejime Fornesimentu Bee ba Konsumu Públiku”, nune’e mos Diploma Ministeriál nú. 1/2004 loron 11 fulan Fevereiru ne’ebé ko’alia kona-bá “Tabela Tarifária” no ikus liu Diploma Ministeriál nú. 1/2009 loron 5 fulan Outubru, kona-bá “Fiskalizasaun Sistema Abastesimentu Bee”.
Diretór Operasionál no Manutensaun (D.O.M), Aleixo dos Santos hatete, BTL, E.P presiza halo sosializasaun, nune’e hodi partilla informasaun kona-bá regulamentu sira ba komunidade, atu sira bele hatene regras, nune’e sira labele viola dekretu lei no diploma ministerial ne’ebé mak eziste ona, kona-bá proibisaun halo koneksaun bee ho ilegalmente ba sistema sira nomos oinsá atu bele selu tarifa bee moos.
Enkuantu atividade diseminasaun ne’e esensiál tebes, atu nune’e bele divulga informasaun kona-bá regulamentu ba proibisaun no obrigasaun kliente nian ne’ebé sita ona iha Dekretu Lei no no Diploma Ministeriál ne’e rasik, nune’e fasilita komunidade sira bele entende didi’ak kona-bá regulamentu hirak ne’e, hanesan labele halo koneksaun ilegál ba sistema ne’ebé instala ona iha komunidade sira nia bairo, aldeia no suku nomos dever ou obrigasaun hodi selu tarifa hafoin kliente sira asesu ona sistema kanalizasaun bee hosi BTL, E.P.
Alende ne’e, sosializasaun ne’e mos, hodi fó koñesimentu ba komunidade sira, nune'e wainhira tékniku tun ba terrenu atu halo melloramentu ba sistema bee moos ne'ebé ezistente no dezliga ligasaun ilegál hirak ne'e, kliente sira bele koopera ho di’ak.
Reprezentante Administradór Munisípiu Ermera hatete, atividade diseminasaun ne’e importante tebes, atu nune’e komunidade sira bele hatene detalla oinsá atu bele kontribui taxa nomos oinsá atu labele kontra regras sira, tanba ne’e nia husu ba BTL, E.P atu servisu hamutuk ho Autoridade lokál hodi kontinua alarga tan atividade sosializasaun ne’e ba suku sira seluk. Autoridade ne’e akresenta liuhosi kontribuisaun selu tarifa mak bele garante sustenbilidade ba manutensaun ba sistema bee ne’ebé eziste ona, nune’e komunidade sir abele uza nafatin ba futuru.
Durante iha atividade diseminasaun ne’e, konsumidór sira hato’o mos apresiasaun, preokupasaun no rekomendasaun balun ba BTL, E.P liu-liu ba munisípiu Ermera nian, atu bele hadi’a sistema bee no halo jestaun ba bee, nune’e konsumidór sira bele sente satisfeitu, hodi bele konstribui reseitas.
Atividade diseminasaun ne’e, sei alarga mos ba nível postu-administrativu sira, maibé hafoin termina iha nível munisipál, atu nune’e komunidade sira bele iha koñesimentu ba dekretu lei, diploma ministeriál kona-bá aktu proibisaun no obrigasaun kliente nian, hafoin asesu ona kanalizasaun sistema bee hosi BTL, E.P no regras seluk BTL, E.P nian.
Hafoin remata sosializasaun, Diretór DOM ho ekipa kontinua enkontru ho Koordenadór BTL, E.P munisípiu Ermera ho funsionáriu sira, iha edifísiu BTL, E.P, hodi rona sira preokupasaun no planu servisu nian durante loron atus ida, iha tinan 2023 ne’e.
Share on Social Media:
