Díli, 30/07/2025, Vise-Prezidente Komisaun Ezekutiva (KE) Bee Timor-Leste Empreza Públika (BTL, E.P) ba Asuntu Tékniku, Sr. José Filipe Ximenes Smith akompaña hosi Diretór O&M, Aleixo dos Santos, Jestór DAK ho ekipa BTL, E.P hamutuk ho PN-BESI-TL, realiza atividade sosializasaun kona-bá Dekretu Lei no Diploma Ministeriál, ba abitante sira iha aldeia Mane Mesak, suku Manleuana, postu-administrativu Dom Aleixo, munisípiu Díli.
Iha atividade sosializasaun ne’e, BTL, E.P partilla informasaun ba abitante sira, liga ba regulamentu ne’ebé abrigu iha Dekretu Lei nú. 41/2020 loron 25 fulan Setembru ne’ebé ko’alia kona-bá “Kriasaun Bee Timor-Leste, Empreza Públika (BTL, E.P), Dekretu Lei nú. 4/2004 loron 11 fulan Fevereiru, kona-bá “Aprova Rejime Fornesimentu Bee ba Konsumu Públiku”, nune’e mos Diploma Ministeriál nú. 1/2004 loron 11 fulan Fevereiru ne’ebé ko’alia kona-bá “Tabela Tarifária” no ikus liu Diploma Ministeriál nú. 1/2009 loron 5 fulan Outubru, kona-bá “Fiskalizasaun Sistema Abastesimentu Bee”. Atu nune’e abitante sira bele entende didi’ak regras BTL, E.P nian, liu-liu kona-bá oinsá atu selu tarifa bee, proibisaun ba koneksaun ilegál, labele estraga fasilidade públika nomos oinsá atu halo ligasaun foun.
Realizasaun atividade sosializasaun ne’e, hodi esplika uluk regulamentu sira ba komunidade aldeia Mane Mesak, molok BTL, E.P halo kanalizasaun bee ba abitante sira, iha aldeia referida.
Vise-Prezidente KE BTL, E.P ba Asuntu Tékniku rekoñese iha fatin balun populasaun sei nafatin enfrenta problema falta bee moos, kauza ida mak tinan-tinan númeru populasaun aumenta, maibé rekursu bee nafatin ou la aumenta. Maibé BTL, E.P nafatin esforsu hodi jere rekursu bee ne’ebé naton, atu komunidade sira bele hetan bee moos hanesan. Tanba ne’e husu ba komunidade no lideransa komunitária sira, atu koopera ho BTL, E.P hodi tau matan ba sistema kanalizasaun sira no labele uza sanyo no halo koneksaun ilegál diretamente ba sistema kanalizasaun sira.
Parte PN-BESI-TL hatete bee no saneamentu hanesan direitu báziku ema nian, tanba ne’e Estadu liuhosi governu tenke garante pontu importante tolu, mak tenke proteje sidadaun kona-bá asesu bee ne’ebé mak adekuadu no sustentavel, tenke garante fornesimentu bee durante oras 24 nomos atu hakonu sidadaun nia direitu hodi asesu ba bee. Hosi prosesu tolu ne’e, la sees hosi sidadaun sira-nia kontribuisaun, oinsá atu uza bee tuir nia dalan, labele estraga bee, wainhira uza hotu tenke taka, nune’e populasaun sira seluk mos bele hetan bee hanesan. No kontribuisaun ida seluk mak, wainhira governu liuhosi BTL, E.P tun ba terrenu hodi halo servisu kanalizasaun bee ba aldeia no suku sira, husu atu komunidade sira bele servisu hamutuk, nune’e hodi fó espasu ba tékniku sira bele halo servisu iha terrenu.
Nune'e mos, PN-BESI-TL akresenta, komunidade la’os atu selu bee, maibé kontribuisaun ne’ebé komunidade fó liuhosi selu tarifa bee fulan-fulan nian ne’e, atu garante sustentabiliodade servisu operasaun no manutensaun nian nomos funsionamentu distribuisaun bee moos ba konsumidor sira.
Administradór Postu-administrativu Dom Aleixo dehan bee ne’e importante ba ema nia moris, nune’e husu populasaun sira partisipa iha sosializasaun ne’e, hodi rona direta informasaun hosi BTL, E.P, kona-bá kanalizasaun bee moos mai iha bairo, aldeia no suku Manleuana, nune’e labele kestiona wainhira iha faze implementasaun nian.
Xefe suku Manleuana rekoñese abitante iha Manleuana barak mak halo koneksaun ilegál no uza bomba elétrika/sanyo hodi dada bee, tanba presaun bee kiik. Maibé ohin bele mai ona fahe informasaun, hodi prepara ba kanalizasaun foun no monta metru kontadór, nune’e bele hahú selu ba Estadu, povu prontu selu, husu ba BTL, E.P, wainhira halo kanalizasaun foun, ba oin tenke kontrola regularmente ba kanalizasaun sira, tenke hadi’a kanu sira ne’ebé estragus nomos tenke iha oráriu distribuisaun bee nian.
Iha biban ne’e, komunidade sira hato’o mos sira-nia preokupasaun ne’ebé sira enfrenta durante ne’e liu-liu kona-bá falta bee moos, nune’e parte BTL, E.P anota no husu ba abitante sira atu rejista, nune’e tékniku sira bele kanaliza bee ba populasaun sira-nia fatin.
Partisipa iha atividade diseminasaun ne’e, Autoridade PA Dom Aleixo, Lideransa suku no aldeia nomos abitante aldeia Mane Mesak, suku Manleuana.
Share on Social Media:
