Dili, 11/12/2023. Ekipa BTL, E.P hosi Departamentu Kontrolu Kualidade no Ambiente (DCQA, sigla portugés) despede voluntáriu nain haat, finalista hosi UNTL, Departamentu Ensinu Kímika ne'ebé mak remata ona sira nia servisu voluntária iha DCQA durante fulan tolu. Seremónia despedida ne'e realiza iha edifísiu DCQA BTL E.P, Bairo-Pité.
Iha biban nee, ekipa voluntáriu halo mos aprezentasaun ikus kona-bá esperiénsia servisu ne’ebé sira hetan durante servisu hamutuk ho DCQA-BTL hanesan halo kontrolu ba kualidade bee ba konsumu umanu, kobransa servisu foka ba sistema tratamentu iha ETA Bemos, Benamauk no Central. Liu-liukona-bá hasa’e koñesimentu kona-bá área Laboratóriu nian, oinsá halo tratamentu ba bee bruta sai bee moos, aprende oinsá halo teste no analiza ba resultadu laboratóriu tuir padraun ba parámetru fíziku, kímiku no mikrobiolojia, halo servisu iha terenu hodi halo tratamentu manuál kada semana nomos kolekta amostra bee fulan-fulan. Hafoin aprezentasaun, voluntáriu sira hato’o mos sira nia agradesimentu ba BTL, E.P tanba bele simu ona sira hodi apreende no hasa'e sira nia koñesimentu iha BTL, E.P, liu-liu iha DCQA.
Alende ne’e, parte BTL, E.P liuhosi DCQA agradese tebes ba voluntáriu sira tanba durante fulan tolu servisu hamutuk ho ekipa DCQA no apresia mos ba esforsu no vontade tomak hodi hakarak apreende, hein katak ho esperiénsia ne’ebé mak sira hetan/ganha, bele sai bukae ida ba voluntáriu sira, hodi kompete iha kampu servisu iha futuru. Atu remata, BTL, E.P fahe mos sertifikadu ba voluntáriu sira, nudár símbolu apresiasaun ida ba sira, durante fulan tolu servisu hamutuk ho ekipa DCQA hodi apoiu ona BTL, E.P ho di'ak.
Share on Social Media:
