Lautém, 07/-2/2023, Ekipa Bee Timor-Leste Empreza Públika, lidera husi Diretór Operasionál no Manutensaun BTL, E.P, Sr. Aleixo dos Santos, akompaña Ofisiál Legal BTL, E.P, no Ofisiál DAK, kordenadór BTL, E.P munisípiu Lautém hamutuk ho funsionáriu destakadu, hala’o desiminasaun dekreitu lei & diploma ministerial BTL, E.P nian, ba konsumidor sira, iha Munisípiu Lautém, atividade ne’e realiza iha salaun Dom Bosco Lospalos Villa.
Objetivu husi desiminasaun ne’e, atu partilla regras BTL, E.P, liu-liu kona-bá dekreitu lei no diploma ministeriál hanesan dekreitu lei nú. 41/2020 de 25 setembru kriasaun Bee Timor-Leste, Empreza Públika, dekreitu lei nú. 4/2004 de 11 fevereiru “ aprova rejime fornesimentu bee ba konsumu públiku “ diploma ministeriál nú. 1/2004 de 11 fevereiru “ Tabela Tarifária “ no diploma ministerial nú. 1/2009 de 5 outobru “ Fiskalizasaun Sistema Abastesimentu Bee”
Iha desiminasaun ne’e, Diretór Operasional no Manutensaun esplika, regras hirak ne’ebé parte BTL, E.P partilla ne’e, atu bele ajuda kliente sira, hodi bele kontribui hanesan, labele halo pratíka ligasaun bee ilegál, labele uza Sanyo, maibé persija halo registu mak tékniku BTL, E.P rasik tun ba terrenu halo ligasaun bee ba komunidade sira nia uma, nune’e viziñu sira seluk mos bele asesu hotu bee.
Diretór O&M ne’e akresenta, ekipa tékniku Bee Timor-Leste, Empreza Públika dadaun ne’e kontinua foku halo melloramentu ba sistema bee moos ezistente iha kapitál munisípiu sira, nune’e bee bele to’o ba ema hotu, maibé dala barak komunidade balun la konsege asesu bee, tamba balun mos fura rasik bee husi kanu distribuisaun no kanu transmisaun, ne’ebé rezulta bee sulin estraga de’it, ho nune’e liu husi desimina informasaun ida ne’e, bele fasilita konsumidor sira bele intende, hodi labele pratíka aktu ida ne’e.
Iha fatin hanesan Administradór Munisípiu Lautém, Domingos Sávio hatete, polítika VIII governu hodi estabele BTL, E.P ne’e, atu ajuda estadu no governu hodi rekolla reseitas, maibé BTL, E.P halo esforsu hodi kanaliza bee ba komunidade sira asesu ona bee, komunidade mos iha dever atu kontribui liu husi selu tarifa bee.
Iha sorin seluk, Komandante PNTL Munisípiu Lautém, Antônio Fernandes informa, bee importante tebes ba ema nia moris, tamba ne’e parte Polisia Nasional Timor-Leste Lautém prontu kolabora servisu hamutuk ho BTL, E.P, hodi bele hadi’a sistema bee, nune’e bele lori bee hakbesik ba komunidade sira nia hela fatin.
Partisipa iha atividade desiminasaun ne’e, Administradór Munisípiu Lautém, Administradór Postu Administrativu, Xefe Suku, Xefe Aldeia, PNTL no komunidade sira.
Share on Social Media:
