Díli, 02/08/2023, Prezidente Komisaun Ezekutiva BTL, E.P, Eng. Carlos Peloi dos Reis, akompaña husi Vise-Prezidente Komisaun Ezekutiva BTL, E.P, ba Asuntu Sistema Bee Saneamentu no Drenajen, Gustavo da Cruz, hamutuk ho Sekretáriu Estadu Eletrisidade Bee no Saneamentu (SEEAS, sigla portués), audensia ho Komisaun E ne'ebé trata asuntu Infraestrutura Parlamentu Nasionál. Audensia ne’e hala'o iha Uma Fukun Parlamentu Nasionál.
Parlamentu Nasionál Komisaun E konvida Sekretáriu Estadu Eletrisidade Bee no Sameamentu, no mos Komisaun Ezekutiva BTL, E.P, tamba hetan keixa husi komunidade balun, iha área Culuhun, ne’ebé la asesu bee, tamba ne’e liu husi audensia ne’e atu bele hetan esklaresimentu husi Sekretariu Estadu Eletrisidade Agua no Saneamentu no mos Komisaun Ezekutiva BTL, E.P ba Komisaun E, hodi bele hatene problema prinsipal saida maka halo, komunidade sira seidauk bele asesu bee.
Liga ba preokupasaun komunidade sira ne’e, Prezidente Komisaun Ezekutiva BTL, E.P hatete, sei orienta tékniku operadór sira, hodi bele haree kestaun ne’e, klaru BTL, E.P rekoñese iha fatin-fatin halerik ba bee moos, liu-liu iha kapitál Díli, maibé esforsu balun hahú halo ona, tamba ne’e BTL, E.P iha polítika rasik, tau prioridade hodi liberta uluk Postu-administrativu sira hamutuk 49, ne’ebé fora husi kapitál Munisípiu sira, ho polítika ida ne’e maka BTL, E.P konsege ona promove projetu hamutuk 34, ne’ebé daudaun ne’e la’o hela (ongoing), nune’e mos balun finaliza daudaun ona no projetu balun mos besik remata, ho intensaun atu lori bee to'o ba komunidade sira nia uma.
Sekretáriu Estadu Eletrisidade Bee no Saneamentu, Santos Noronha mos toma nota ba kestaun hirak ne’e, ne’ebé sei buka meius hodi bele rezolve preokupasaun komunidade nian, maibé persiza mos kontinua konsiensializa informasaun ba komunidade sira iha área refere, hodi bele kompreende regras liu-liu liga ba dekretu lei no diploma ministeriál, hodi evita komunidade sira labele halo ligasaun ilegál, nune’e BTL, E.P bele fornese bee ba ema hotu.
Iha okaziaun ne’e mos Prezidente Komisaun E, Marcos Xavier husu ba Komisaun Ezekutiva BTL, E.P, atu bele identifika área hirak ne’ebé komunidade sira seidauk asesu bee, problema iha saida atu haree kestaun ne’e ho sériu, problema tamba rekursu bee maka menus ka kestaun tamba kanalizasaun maka la liu husi área balun, maka difikulta hodi la hetan bee, tamba bele halo identifikasaun ba aldeia no suku sira ne’e, bele tau planu ba iha Orsamentu Jerál Estadu (OJE) 2024, hodi bele responde ba populasaun nia nesesidade ida ne’e.
Share on Social Media:
