Díli, 18/07/2023. Prezidente Komisaun Ezekutiva (KE) Bee Timor-Leste, Empreza Públika (BTL, E.P), Eng. Carlos Peloi dos Reis hamutk ho Vise-Prezidente KE BTL, E.P ba Asuntu Sistema Bee, Saneamentu no Drenajen, Sr. Gustavo da Cruz enkontru koordenasaun regulár ho parseiru dezenvolvimentu sira ne'ebé investe iha setór bee, hanesan Banku Mundial (WB, sigla inglés), Banku Dezenvolvimentu Aziátiku (ADB, sigla inglés), Department of Foreign Affairs and Trade-DFAT, Japan International Cooperation Agency-JICA, Millennium Challenge Corporation-MCC nomos reprezentante Millennium Challenge Account Timor-Leste (MCA-TL) iha salaun enkontru edifísiu sentrál BTL, E.P, Caicoli, Díli.
Enkontru ne’e, hodi informa ou atualiza progresu servisu kooperasaun ba parseiru dezenvolvimentu sira, ligadu ho parseiru sira nia apoiu ba implementasaun projetu iha setór bee, iha Timor-Leste (TL). Atu nune’e, parseiru sira bele akompaña prosesu hirak ne’ebé daudaun ne’e la’o hela, atu nune’e wainhira iha dezafiu balun ne’ebé sei akontese iha futuru, BTL, E.P sei konvida hikas parseiru sira, hodi halo enkontru koordenasaun.
Ohin BTL, E.P halo enkontru ho parseiru sira hanesan, Banku Mundial ne’ebé finansia ba projetu bee moos iha Baucau no Díli Leste, ADB ne’ebé investe iha munisípiu Baucau, Viqueque, Lautém no Díli Oeste. Nune’e mos ho MCC hodi informa kona-bá prosesu negosiasaun parsela rai ho komunidade afetada hosi projetu Estasaun Tratamentu Bee Fo’er (ETAR, sigla portugés) Bebonuk nian, ne’ebé finansia hosi governu Estadus Unidus Amérika (EUA) liuhosi MCC ho fundus grant. Alende ne’e, atualiza mos ba JICA kona-bá apoiu grant ba intake Bemos ou Tohumeta ne’ebé daudaun ne’e nia prosesu la’o hela. BTL, E.P mos relata ba DFAT kona-bá apoia ne’ebé governu Austrália fó liuhosi DFAT/PARTISIPA hodi ajuda ba normalizasaun sistema bee iha intake Bemos parte I nomos Mutudare nian ne’ebé mak finaliza ona, inklui apoia ba kompras materiál sira mai BTL, E.P. Alende ne’e, atualiza mos prosesu DED ba munisípiu neen seluk hanesan, Aileu, Ermera, Liquiça, Ainaro, Bobonaro no Covalima.
Hafoin rona tiha informasaun hosi Ezekutivu BTL, E.P nian, parseiru dezenvolvimentu sira apresia tebes ho progresu sira ne’e no sira nafatin apoia atu oinsá bele aselera lalais prosesu hirak ne’e hotu. Liu-liu ba munisípiu haat nian hanesan, munisípiu Baucau, Viqueque, Lautém no Manufahi ne’ebé BTL, E.P rasik submete ona ba Komisaun Nasionál Aprovizionamentu (CNA, silgla portugés) atu inisia ba prosesu aprovizionamentu ba faze konstrusaun nian. Nune’e mos ba Díli Oeste nian, ne’ebé mak antes ne’e, aprova ona hosi Konselu Ministru (KM) no daudaun ne’e sei hakat ba prosesu aprovizionamentu nian.
Share on Social Media:
