Díli, 19/06/2023, Prezidente Komisaun Ezekutiva (K.E) Bee Timor-Leste, Empreza Públika (BTL, E.P), Eng. Carlos Peloi dos Reis akompaña hosi Vise-Prezidente KE ba Asuntu Boa Governasaun no Fortalesimentu Institusionál BTL, E.P, Sra. Elizabeth Amaral, Diretór DEI, Jestór Infraestrutura ho Legál nomos parte Aprovizionamentu, asina kontratu ho kompañia Tansos Unipessoal Lda, hodi implementa Projetu Konstrusaun Sistema Fornesimentu Bee Moos, ba iha postu-administrativu Lolotoe, munisípiu Bobonaro. Seremónia asina kontratu ne’e, realiza iha salaun enkontru, edifísiu sentrál BTL, E.P, Caicoli.
Iha entrevista Prezidente KE BTL, E.P hatete, BTL, E.P kontrata kompañia ne’e hodi kanaliza bee ba Lolotoe, hein katak iha tempu badak kompañia implementadór bele mobiliza rekursu, hodi hahú ona servisu fíziku iha terrenu.
“Ohin ita asina kontratu ida ho ita nia parseiru lokál/kompañia naran Tansos, para bele komesa halo servisu kanalizasaun bee moos, iha kapitál postu Lolotoe nian, liu-liu iha suku Opa. Projetu ida ne’e sei lori tempu 6 meses para remata, ita espera katak buat hotu la’o di’ak para depois 6 meses, ita nia komunidade sira bele asesu ona bee iha área refere”, hatete Ezekutivu BTL, E.P
Ezekutivu BTL, E.P husu ba Autoridade lokál atu apoia hodi rezolve kestaun sosiál nian, wainhira akontese durante implementasaun obra fíziku iha terrenu, enkuantu ba kestaun tékniku nian, kompañia implementadór ho BTL, E.P mak sei haree no responsabiliza, nune’e labele perturba servisu fíziku iha terrenu. Tanba ne’e, Ezekutivu solisita ba parte hotu, atu mantein nafatin liña koordenasaun, wainhira iha problema ruma presiza komunika ba malu, hodi rezolve lalais, nune’e kompañia bele aselera projetu ne’e tuir tempu ne’ebé estabelese ona.
Alende ne’e, atu garante kualidade projetu kanalizasaun sistema bee ne’e rasik no rezolve kestaun téknika sira, BTL, E.P mos sei destaka tékniku ou enjeñeiru nain rua, hodi akompaña servisu fíziku iha terrenu to'o projetu ne’e remata.
Iha fatin hanesan, Diretór Kompañia Tansos Unipessoal Lda, Agostinho Vicente Santos, promete no garante katak, sira sei utiliza sira nia kapasidade hodi finaliza obra fíziku, tuir tempu ne’ebé estabele ona iha kontratu.
Alende ne’e, Administradór Postu-Administrativu Lolotoe apresia tebes, tanba liuhosi asina kontratu ohin entre BTL, E.P ho kompañia, bele responde ona ba komunidade sira nia preokupasaun kona-bá problema bee durante tinan naruk nia laran. Administradór mos hato’o nia prontidaun hodi koopera ou servisu hamutuk ho parte hotu, tantu BTL, E.P nomos kompañia konstrutór, iha parte sosiál nian, nune’e labele atraza projetu fíziku iha terrenu, nune’e komunidade sira bele asesu lalais ba bee moos.
Iha biban ne’e, Xefe Suku Opa, Graciano Orlando Afonso agradese ba BTL, E.P no kompañia no hanesan autoridade lokál prontu atu koopera ho kompañia implemetadór, hodi bele finaliza lalais projetu kanalizasaun sistema bee moos refere, nune’e bele benefisia ba populasaun sira. Tanba atualmente sistema kanalizasaun eziste, maibé komunidade sira seidauk hetan bee ho máximu, populasaun kontinua halerik ba bee moos, ho nune’e liuhosi asina kontratu ohin, garante katak hafoin projetu sistema bee ne’e remata, komunidade sira bele asesu ona ba bee moos ho di’ak.
Projetu Konstrusaun Sistema Fornesimentu Bee Moos iha P.A Lolotoe, munisípiu Bobonaro ne’e, sei implementa hosi kompañia Tansos Unipessoal Lda. ho durasaun tempu fulan neen no orsamentu ne’ebé prevé ba projetu refere ho montante $ 172,649.82
Projetu bee moos ne’e ho sistema gravitasaun, nune’e sei kanaliza bee hosi bee matan Maunis ne’ebé ho nia débitu 1,25 lps no bee matan Maukou ho débitu 0,8 lps. No projetu bee moos ne’e, sei transforma ba sistema urbana, iha ne’ebé sei instala mos metru kontadór ba benefisiáriu sira. Alende ne’e, projetu kanalizasaun refere sei intalla kanu tranzmisaun no distribuisaun ho distánsia kilómetru 6,120.
Enkuantu projetu ne’e rasik, sei kobre iha suku Opa, aldeia Raimean ho totál populasaun 966, nune’e mos sei instala metru kontadór unidade 161 ba uma kain sira, inklui sei fornese mos bee ba postu saúde, eskola no igreja.
Share on Social Media:
