Aileu, 11/12/2025. Diretór O&M Bee Timor-Leste, Empreza Públika (BTL, E.P), Aleixo dos Santos hamutuk ho Koordenadór BTL, E.P Munisípiu Aileu, akompaña Sekretáriu Estadu Eletrisidade, Bee no Saneamentu (SEEAS, sigla portugés), Santos Noronha, hala’o sorumutu ho ho Prezidente Autoriedade Munisípiu Aileu no Autoridade Postu-administrativu Aileu Vila, iha salaun enkontru Administrasaun Aileu.
Sorumutu ne’e, hodi partilla informasaun no rona direta preokupasaun sira kona-bá problema bee, saneamentu no eletrisidade hosi parte PAM no APA Aileu nian. Inklui identifika kauza hosi problema referidu, hodi fó solusaun, nune’e bele responde ba povu nia halerik.
Durante iha reuniaun ne’e, Prezidente Autoridade Munisípiu Aileu hato'o agradesimentu kle’an, tanba bele to’o konvoka sorumutu ida ho rona direta problema no fó solusaun ba kestaun hirak ne’e. Maske prokupasaun barak, maibé nafatin tenta kria liña koordenasaun ne’ebé di’ak ho parte hotu nomos prontu fó apoiu no koopera, hodi bele lori benefísiu ba populasaun sira.
Partisipa iha sorumutu ne’e, Reprezentante MOP Munisípiu Aileu, BTL.EP, SMASA no EDTL, E.P Munisípiu Aileu no Prezidente Konsellu Administrativa EDTL, E.P.
Share on Social Media:
