Aileu, 04/12/2023, Ekipa Bee Timor-Leste, Empreza Públika (BTL, E.P) munisípiAileu akompaña tékniku hosi kompañia H2O, hala’o peskiza jeoelétriku, iha aldeia Hudi-Laran, suku Aisirimou, postu-administrativu Aileu Villa, munisípiu Aileu.
Objetivu hosi peskiza jeoelétriku ne’e, hodi identifika rekursu bee iha rai okos no halo análize atu bele hatene kona-bá rekursu bee iha fatin refere di’ak ou lae nomos hodi hatene bee iha fatin ne’e boot ou lae, molok hakat ba faze perfurasaun.
Tuir relatu hosi BTL, E.P Aileu katak, molok tun ba terrenu, ekipa rua (BTL, E.P ho H2O) hala'o uluk enkontru ho administradór no xefe suku, hodi informa prezensa kompañia nian iha fatin ne'e no hodi koordena autoridade lokál sira inklui aproxima mos ho rai na’in. Hosi sorumutu ne'e sira koopera di’ak tebes ho BTL, E.P no kompañia implementadór.
Peskiza jeoelétriku ne’e hala’o iha fatin ou pontu ida de’it no rezultadu hatudu, fatin refere iha poténsia rekursu bee, nune’e planeia atu halo perfurasaun, hodi hatan ba komunidade sira nia preokupasaun kona-bá problema falta bee moos, iha suku Aisirimou. Maibé molok hakat ba faze perfurasaun nian, kompañia implementadór sei halo uluk aprezentasaun ba BTL, E.P nasionál kona-bá atividade peskiza jeoelétriku ne’e.
Share on Social Media:
