Jakarta, 19/02/2023, Diretór Operasionál no Manutensaun (DOM) BTL, E.P, Sr. Aleixo dos Santos reprezenta Ezekutivu Bee Timor-Leste, Empreza Públika (BTL, E.P), hodi partisipa iha seremónia enseramentu ba atividade formasaun, ne’ebé hala’o iha BTAM Bekasi Jakarta, Indonézia.
Prezensa Diretór DOM iha Jakarta ne’e, hodi hato’o mensajen lasu amizade no agradesimentu Prezidente Komisaun Ezekutiva (K.E) Bee Timor-Leste, Empreza Públika (BTL, E.P) nian ba Jerente no Fasilitadór sira, hosi Sentru Treinamentu Bee Potável Jakarta Indonézia (Balai pelatihan Air Minum Indonesia) ne’ebé fó ona treinamentu/formasaun ba Tékniku Operadór sira no fó mos korajen ba tékniku ou formandu sira, hodi tuir formasaun ne’e ho di’ak, nune’e bele aplika fali sira nia koñesimentu hirak ne’e iha Timor-Leste, durante ezekuta servisu tékniku nian iha terrenu.
Alende ne’e, agradese wa’in mos ba parseiru JICA Timor-Leste, ne’ebé apoiu ona, hodi fasilita tékniku sira ba tuir treinamentu durante semana ida, iha Jakarta Indonézia.
Iha biban ne’e, Formadór sira hatete tempu ba formasaun ne’e limitadu tebes, maibé sira apresia tanba formandu/tékniku sira bele hetan matéria iha teoria no prátika tuir planu ne’ebé traxa ona.
Iha fatin hanesan, parte hosi JICA TL konsidera maske ho tempu ne’ebé limitadu maibé hein katak formandu sira bele kapta matéria hirak ne’e, hodi bele aplika fali iha terrenu, tanba iha posibilidade sei iha monitorizasaun ba treinamentu ne’ebé sira hetan ona.
Durante estadia iha Jakarta Indonézia, Diretór DOM mos hetan konvite, hodi ba vizita Fatin/Sentru Treinamentu, hodi haree diretamente fasilidade hirak ne’ebé durante ne’e utiliza hodi hanorin/fó formasaun ba formandu sira, hanesan Fasilidade/ekipamentu mekánika nian, kanalizasaun no asesoris nian nomos laboratóriu, fatin tratamentu, borehole no sala ne’ebé hodi tuir treinamentu ne’e rasik.
Enkuantu Tékniku Operadór sira ne’ebé ba tuir treinamentu iha Jakarta Indonézia ne’e, fahe ba grupu rua. Grupu ida iha ema nain 10 ne’ebé sei foku liu ba área Operasaun no Manutensaun ba bomba no grupu daruak nian kompostu hosi ema nain 10 ne’ebé sei foku liu ba área Kanalizasaun Sistema Transmisaun no Distribuisaun nian. Entretantu formasaun/treinamentu ne’e rasik ho durasaun semana ida.
Entidade sira ne’ebé partisipa iha seremónia enseramentu ne’e hanesan Xefe Ajénsia Dezenvolvimentu Rekursu Umanu MOP no Abitasaun Dr. Ir. Khalawi Abdul Hamid, M.Sc., M.M., IPU, Xefe Sentru Dezenvolvimentu Kompeténsia Rekursu Ídriku no Asentamentu Ir. Alexander Leda, S.T, M.T), Xefe Sentru Teknolojia Água Potável ou Reprezentante Ir. Fitrijani Anggraini, M.T, Xefe Sentru Dezenvolvimentu Kompeténsia PUPR Rejiaun III Jakarta, Drs. Haris Marzuki Susila, Profesór Téknika Orientasaun, Formadór, Parte JICA TL Diretór DOM ho Formandu BTL, E.P no konvidadus sira seluk.
Share on Social Media:
