Díli,06/02/2023, Prezidente Komisaun Ezekutiva (K.E) Bee Timor-Leste, Empreza Públika (BTL, E.P) Eng. Carlos Peloi dos Reis ho I Vise-Prezidente KE BTL, E.P, Sr. Gustavo da Cruz, enkontru dahuluk ho ekipa hosi United Nations, World Food Programme-UN WFP Timor-Leste, hodi halo diskusaun kona-bá WFP nia planu atu apoia BTL, E.P iha setór bee, liu-liu ba iha Funsionamentu Bee Rurál no Konservasaun Bee. Reunaiun ne’e, realiza iha salaun enkontru Ezekutivu, edifísiu sentrál BTL, E.P, Caicoli.
Objetivu hosi enkontru ne’e, WFP mai hato’o sira nia inisiativa, ne’ebé hakarak apoia BTL, E.P, maske WFP sira nia servisu hodi haree ba área aihan ou hahan ho nutrisaun, maibé sira nia planu estratejia ba tinan 2023 nian, atu haree mos ba aspeitu ne’ebé mak iha relasaun ho hahan, tanba ne’e, WFP nia haree bee mak sai setór ida ne’ebé importante iha sira nia misaun, ho ida ne’e mak WFP mai hala’o enkontru dahuluk ho Ezekutivu BTL, E.P, hodi rona ou hetan informasaun balun hosi parte BTL, E.P nian, ligadu ho WFP nia planu atu apoia mai BTL, E.P ne’ebé sei estabelese iha tempu badak.
Durante iha enkontru dahuluk ne’e, parte rua (BTL, E.P no WFP) deskute asuntu rua, hanesan sistema bee rurál sira ne’ebé durante ne’e eziste, maibé nia funsionamentu parsiál nomos oinsá atu sistema hirak ne’e bele funsiona fila-fali ho di’ak, mak presiza haree no fortifika iha parte jestaun nian, nune’e hodi jere fasilidade ou sistema bee iha área rurál sira.
Nune’e mos, pontu daruak nian, mak relasiona ho alterasaun klimátika, nune’e afeta direta ba rekursu bee ne’ebé mak durante ne’e eziste, liu-liu kuantidade ou débitu rekursu bee menus no ikus mai iha rekursu bee balun to’o maran, tanba ne’e, oinsá WFP bele haree no fó apoiu ba iha kestaun ne’e, hanesan halo konservasaun, protesaun ou halo estudu balun hanesan oinsá bele halo estudu viabilidade ba rekursu ne’e rasik.
Ekipa WFP kontente tanba sira bele hetan informasaun balun hosi Ezekutivu BTL, E.P nian, nune’e sira bele prepara proposta, ligadu ba apoiu ne’ebé WFP rasik sei estabelese ba BTL, E.P ho durasaun tempu tinan ida, bazea ba sira nia planu estratejia tinan 2023 nian.
Alende ne’e, hafoin finaliza enkontru dahuluk ne’e, ekipa WFP rasik sei elabora proposta ida, hodi submete ba Banku Mundiál, wainhira proposta refere hetan ona aprovasaun mak foin bele hakat ba faze implementasaun nian.
Hafoin ekipa WFP hato’o tiha sira nia iniativa kona-bá apoiu ne’e, parte Ezekutivu BTL, E.P apresia tebes, tanba inisiativa hosi parseiru internasionál sira ne’e, hanesan fontes rekursu eksterna ne’ebé mak di’ak, ho nune’e BTL, E.P loke odamatan hato’o bem vindo ba parseiru sira, hodi servisu hamutuk ho BTL, E.P, atu dezenvolve empreza públika ne’e ou setór bee bele la’o di’ak, nune’e hodi bele atende komunidade sira.
Share on Social Media:
