Díli, 06/01/2023, Prezidente Komisaun Ezekutiva (K.E) Bee Timor-Leste, Empreza Públika (BTL, E.P), Eng. Carlos Peloi dos Reis, akompaña hosi Diretór Operasaun no Manutensaun (DOM) enkontru ho ekipa Unicef, iha salaun enkontru Ezekutivu, edifísiu sentrál BTL, E.P, Caicoli.
Objetivu hosi enkontru ne’e, hodi halo koordenasaun servisu entre BTL, E.P ho Unicef, liu-liu kona-bá planu treinamentu ba Grupu Maneja Fasilidade (GMF) sira nomos futuru kooperasaun servisu kona-bá implementasaun sistema bee moos, iha Timor-Leste (TL), liu-liu iha munisípiu Ainaro no Viqueque.
Treinamentu ne’e sei implementa iha tempu badak no sei fó ba GMF, iha suku sira ne’ebé eziste ona instalasaun sistema bee moos, nune’e wainhira hetan ona treinamentu, grupu refere bele iha koñesimentu hodi jere sistema bee ne’ebé eziste ona iha sira nia suku rasik.
Enkuantu fundus ne’ebé apoiu hosi Unicef mai BTL, E.P hodi fó treinamentu ba Grupu Maneja Fasilidade (GMF), hamutuk Dollar Amerikanu Rihun haat nulu ($ 40.000,00).
Alende ne’e, Unicef mos relata kona-bá ofisiál handover ba programa covid-19 ou fase liman, iha ne’ebé Unicef mos apoiu fundus balun mai BTL, E.P, hodi instala tanke sira iha fatin públiku, hodi fasilita komunidade sira bele fase liman, durante iha periodu Covid-19.
Share on Social Media:
