Díli, 24/02/2025, Prezidente Komisaun Ezekutiva (KE) Bee Timor-Leste, Empreza Públika (BTL, E.P), Sr. Gustavo da Cruz, Vise-Prezidente KE BTL, E.P ba Asuntu Tékniku, Sr. José Filipe Ximenes Smith, Vise-Prezidente KE BTL, E.P ba Asuntu Korporativu, Sr. Manuel Tomás Amaral de Carvalho, akompaña hosi Diretór Diresaun Enjeñaria no Investimentu (DEI), Diretór Operasaun no Manutensaun (DOM) no Diretór Administrasaun no Finansas (DAF) hala’o enkontru ho ekipa hosi PT Grunfos Trading Indonesia. No enkontru ne’e realiza iha sala reuniaun edifísiu sentrál BTL, E.P, Caicoli.
Reuniaun ne’e, PT Grunfos Trading Indonesia hakarak mai vizita no halo aprezentasaun kona-bá sira-nia produtu ba BTL, E.P, liu-liu kona-bá sistema bomba nomos vizita ne’e, hodi hametin liu tan kooperasaun servisu entre parte rua
Prezidente KE BTL, E.P hatete, ohin PT Grunfos Trading Indonesia mai halo introdusaun ba produtu sira liu-liu kona-bá bomba, tanba durante ne’e, BTL, E.P uza hela bomba ho marka Grundfos, ho nune’e kompañia PT Grunsdfos Trading Indonesia sente katak sira iha responsabilidade téknika no administrativamente sira hakarak introduz sira-nia produtu balun foun ba utilizadór hanesan BTL, E.P, atu nune’e hodi asegura sustentabilidade bomba ne’ebé BTL, E.P utiliza.
Alen de ne’e, sira mos sei partilla informasaun balun liga ba prosesu operasaun no manutensaun ba sistema bomba Grundfos, atu bele efetivu liu tan, tuir tempu ne’ebé mak fábrika sira hato’o ona katak, maioria durasaun tempu ba operasaun bomba ida, ho máximu to’o tinan 25, maibé iha TL dala ruma uza bomba la to’o peíodu ne’ebé mak iha. Tanba ne’e, sira mai halo kapasitasaun no fahe informasaun sira kona-bá sira-nia produtu nomos bele fó koñesimentu di’ak liu tan ba tékniku sira ne’ebé durante halo operasaun no manutensaun ba sisteam bomba sira.
Ezekutivu BTL, E.P husu ba ekipa Grundfos atu aprezenta no esplika detalla ba tékniku sira, nune’e sira bele halo operasaun ba bomba sira ho di’ak nomos bele hala’o vizita ba terrenu, hodi observa direta sistema bomba sira.
Hafoin remata enkontru ho Ezekutivu BTL, E.P nian, Diretór O&M, E&I no A&F kontinua halo koordenasaun ho ekipa PT Grunfos Trading Indonesia ba preparasaun atu hala’o vizita ba terrenu.
Tuir planu aban, ekipa PT Grunfos sei kontinua enkontru ho ekipa téknika BTL, E.P nian, hodi halo aprezentasaun kona-bá parte téknika nian, liu-liu oinsá atu halo operasaun no manutensaun ba sistema bomba.
Share on Social Media:
