Díli, 10/01/2024, Vise-Prezidente Komisaun Ezekutiva Bee Timor-Leste, Empreza Públika (BTL, E.P) ba Asuntu Sistema Bee, Saneamentu no Drenajen, Sr. Gustavo da Cruz, enkontru ho ekipa hosi Plataforma Nasionál BESI Timor-Leste (PN-BESI-TL), iha Vise-Prezidente nia knaar fatin, BTL, E.P Caicoli, Díli.
Reunaiun ne’e, hodi informa no halo koordenasaun ho BTL, E.P, kona-bá planu peskiza ba konsumidór sira iha kapitál Díli, liu-liu kona-bá satisfasaun konsumidór bee moos nian. Tanba ne’e, ohin, PN-BESI-TL mai koordena hodi hetan kooperasaun hosi BTL, E.P molok realiza peskiza ne’e.
Hafoin rona tiha esplikasaun hosi Koordenadór PN-BESI-TL relativamente ba planu peskiza ne’e, Vise-Prezidente KE BTL, E.P ba Asuntu Sistema Bee, Saneamentu no Drenajen, reprezenta BTL, E.P apresia tebes inisiativa refere no BTL, E.P sei koopera hodi hala’o programa ida ne’e.
Iha biban ne’e, Ezekutivu BTL, E.P husu ba parseiru nasionál PN-BESI-TL atu kria liña koordenasaun di’ak ho koordenadór zona sira ne’ebé destakadu iha kapitál Díli, hosi zona 1 to’o 11, hodi hetan amostra hosi zona ida-idak, nune’e kestionáriu ne’ebé prepara bele koresponde ho di’ak. Alende ne’e, BTL, E.P mos solisita atu koordena ho parte DOM no DAK, nune’e BTL, E.P bele impoin pontu balun iha kestionáriu, nune’e, wainhira rezultadu hosi peskiza refere, mak iha informasaun balun ligadu ho preokupasaun konsumidór nian, bele fó ou sai indikadór ida ba BTL, E.P atu bele halo intervensaun.
Planu ou programa peskiza ne’e, bazeia ba pedidu hosi Parlamentu Nasionál (PN), liu-liu hosi Komisaun E ne’ebé trata asuntu Infraestrutura, ne’ebé husu ba sosiedade sivil sira, liu-liu sira ne’ebé servisu iha relasaun ho setór bee, atu halo peskiza kona-bá satisifasaun konsumidór bee moos iha Díli nomos utilizasaun ba kanalizasaun bee públiku no perfurasaun privadu sira.
Relativamente ba peskiza ne’e, iha tempu badak, PN-BESI-TL sei hato’o karta ofisiál mai BTL, E.P, nune’e hodi akompaña tun ba terrenu. Nomos PN-BESI-TL sei halo lansamentu ba programa refere, molok ba implementasaun. No tuir planu, programa peskiza ne’e, sei realiza iha fulan oin.
Antes ne’e, PN-BESI-TL halo ona peskiza refere iha munisípiu sira, liu-liu ba sistema bee rurál nian no sira hato’o ona rekomendasaun mai BTL, E.P ligadu ho sistema bee iha munisípiu, nune’e preokupasaun balun BTL, E.P responde ona no balun seidauk. No daudaun ne’e, PN-BESI-TL sei halo peskiza foku liu iha kapitál Díli.
Share on Social Media:
