Díli, 11 Fevereiru 2026. Prezidente Komisaun Ezekutiva (KE) Bee Timor-Leste, Empreza Públika (BTL, E.P), Gustavo da Cruz ho Koordenadór PMU 𝑊𝑎𝑡𝑆𝑎𝑛, Nelson Mesquita akompaña S.E Ministru Obras Públikas (MOP), Samuel Marçal aprezenta projetu konstrusaun sistema abastesimentu bee moos ba kapitál Munisípiu Baucau nian, iha reuniaun Konnsellu Ministrus (KM), ne’ebé realiza iha Palásiu Governu.
Hafoin aprezentasaun hosi MOP, Konsellu Ministrus aprova no deside hodi autoriza despeza no abertura prosesu aprovizionamentu ba konstrusaun sistema bee abastesimentu bee moos iha Munisípiu Baucau. Projetu ne’e ho objetivu atu garante fornesimentu bee ne’ebé regulár, seguru no adekuadu ba konsumu umanu esensialmente ba populasaun iha munisípiu refere, nune’e atu hadi’a kondisaun saúde públika nomos kualidade moris komunidade nian.
Perante reunaiun KM ne’e, S.E Primeiru-Ministru (PM), Kay Rala Xanana Gusmão apresia tebes ba progresu servisu BTL, E.P nian, tanba observa iha fatin balun, populasaun hahú asesu ona bee moos. Tanba ne’e, S.E PM husu ba BTL, E.P atu kontinua servisu, hodi serví povu ho país ida ne’e ba nesesidade bázika bee no saneamentu.
Ho rezultadu hosi KM, Prezidente KE BTL, E.P hato’o parabéns no agradese ba ekipa konjunta ne’ebé durante ne’e halo esforsu hosi inísiu to’o ohin loron, hanesan PMU, Ministériu Obras Públikas (MOP), ADN, BTL, E.P, parte Sekretaridu Grande Projetu ne’ebé iha semana kotuk, aprezenta ona projetu ne’e no hodi hetan aprovasaun CAFI, nune’e ohin, bele aprezenta ba KM no hetan ona aprovasaun projetu investimentu sistema bee ba iha kapitál Munisípiu Baucau.
Share on Social Media:
