Díli, 07/03/2023, I Vise-Prezidente Komisaun Ezekutiva (KE) Bee Timor-Leste, Empreza Públika (BTL, E.P) hamutuk ho Project Management Unit-PMU BTL, E.P akompaña hosi Asesór Tékniku hosi Gabinete Ministériu Obras Públikas (MOP) hala’o enkontru ho Ajénsia Dezenvolvimentu Nasionál, Institutu Públiku (ADN, I.P), iha salaun enkontru ADN,I.P, Fatuhada.
Objetivu hosi enkontru ne’e, hodi halo koordenasaun no haree kona-bá asuntu Detail Engineering Design-DED ba projetu projetu melloramentu sistema bee moos no saneamentu ba munisípiu haat nian, ne’ebé antes ne’e submete ona ba ADN hodi halo verifikasaun. No parte ADN finaliza ona verifikasaun ba BoQ no dezeñu no ekipa téknika hosi ADN rasik tun direta ona ba terrenu hodi vizita lokál iha munisípiu haat ne’e. Tanba ne’e, ADN hakarak enkontru uluk ho na’in ba projetu hanesan MOP/BTL, E.P no PMU BTL, E.P, hodi haree asuntu ne’e, molok konvida ho konsultór, atu bele kompleta informasaun nomos presiza hetan klarifikasaun, hadi’a no ajusta asuntu tékniku balun ne’ebé mak detekta no rekomenda hosi ADN.
Hafoin rona tiha rekomendasaun hosi ADN, parte BTL, E.P apresia no husu atu parte rua nafatin halo aproximasaun nune’e ba futuru bele la’o di’ak liu tan. Nomos BTL, E.P no ADN konkorda atu aselera prosesu refere, nune’e bele finaliza lalais, hodi avansa ba pasu tuir mai (prosesu konkursu).
Alende ne’e, iha tempu badak, BTL, E.P rasik sei konvoka reuniaun ho konsultór AdP ne’ebé mak dezenvolve DED ba munisípiu haat ne’e, hodi hato’o informasaun balun ne’ebé mak rekomenda hosi ADN, nune’e konsultór bele halo justifikasaun ou esplikasaun detalla no kompleta rekezitus balun kona-bá asuntu refere.
Enkuantu DED ne’e, kona-bá projetu melloramentu sistema bee moos no saneamentu ne’ebé sei implementa iha kapitál munisípiu Baucau, Viqueque, Lautém no Manufahi.
Share on Social Media:
