Díli, 23/10/2023. Prezidente Komisaun Ezekutiva (KE) Bee Timor-Leste Empreza Públika (BTL, EP), Sr. Gustavo da Cruz, akompaña hosi Diretór DAF no tékniku sira hamutuk ho S.E Ministru Obras Públikas (MOP), Sr. Samuel Marçal ho ekipa nomos Institutu Jestaun Ekipamentu no Apoiu ba Dezenvolvimentu Infraestrutura, Institutu Públiku (IGEADI, I.P, sigla portugés) hala’o limpeza no raut lixu, iha kapitál Díli.
Atividade limpeza ne’e, hahú dader to’o lokraik, grupu limpeza ne’ebé lidera hosi S.E MOP hahú limpeza no raut fo’er hosi área Comoro, Delta, Aimutin nomos fatin sira seluk, hafoin tula ba kareta, hodi bá fakar iha lixeira Tibar.
Enkuantu grupu seluk, lidera hosi S.E Primeiru-Ministru (PM), Sr. Kay Rala Xanana Gusmão, hodi hamoos no raut lixu iha parte Díli Leste.
Lixu ne’ebé ho kuantidade boot no loron ba loron kontinua aumenta, hodi halakon imajen sidade Díli nia furak nudár kapitál nasaun nian nomos bele hamosu inundasaun wainhira akontese udan ho intensidade boot inklui bele lori moras ba komunidade sira. Tanba ne'e, atu evita problema hirak ne’e, mak Governu halo intervensaun ne’e, hodi halo limpeza jerál iha kapitál Díli.
Share on Social Media:
