Díli, 26/09/2023. Vise-Prezidente Komisaun Ezekutiva (KE) Bee Timor-Leste, Empreza Públika (BTL, E.P) ba Asuntu Sistema Bee, Saneamentu no Drenajen, Sr. Gustavo da Cruz, partisipa iha enkontru koordenasaun ho liña ministeriál sira, iha salaun enkontru, Ministériu Obras Públikas (MOP), Caicoli, Díli. Enkontru ne’e, organiza hosi MOP ligadu ho pedidu no orientasaun hosi S.E Vise-Primeiru-Ministru no Primeiru-Ministru Ezersísiu.
Enkontru ne’e, lidera hosi S.E Vise-Primeiru-Ministru no Primeiru-Ministru Ezersísiu, Sr. Mariano Assanami Sabino no S.E Ministru Obras Públikas, Sr. Samuel Marçal, hanesan reuniaun inísiu ho objetivu, hodi koordena ou ko’alia, oinsá bele kria ekipa Task Force Interministeriál ida, atu servisu hamutuk ho tékniku sira, hodi haree ou tau atensaun no rezolve problema bee moos, iha Timor-Leste (TL).
Durante iha enkontru ne’e, Vise-Prezidente KE BTL, E.P halo mos aprezentasaun kona-bá atinjimentu no planu estratéjiku BTL, E.P nian ne’ebé hodi fornese bee ba populasaun sira nomos saneamentu, iha territóriu nasionál. Hafoin aprezentasaun, iha biban ne’e, ministériu ida-idak, hato’o sira nia komentáriu no iha ministériu balun mos hato’o sira nia dadus badak, kona-bá iha fasilidade sira iha TL, ne’ebé asesu no seidauk asesu ba bee moos no saneamentu.
Iha biban ne’e, S.E Vise-Primeiru-Ministru no Primeiru-Ministru Ezersísiu husu ba liña ministeriál sira ne’ebé partisipa iha reuniaun ne’e, atu foti dadus kompletu kona-bá populasaun no fasilidade sira iha territóriu nasionál ne’ebé mak durante ne’e, asesu ona bee moos no hirak ne’ebé seidauk asesu ba bee moos. Atu nune’e, ba oin sei forma ekipa ida, hodi bele halo intervensaun ou rezolve kestaun bee moos ne’e rasik.
Atu rezolve problema bee moos ne’e, S.E Vise-Primeiru-Ministru no Primeiru-Ministru Ezersísiu hatete, tenke ho polítika ida ne’ebé di’ak no presiza servisu ekipa interministeriál ida ne’ebé forte, tékniku ne’ebé forte, hodi fó apoia ba BTL, E.P ne’ebé nudár implementadór, hodi haree ba kestaun ne’e, liuhosi apoia parseiru implementadór kada ministériu sira, nomos instituisaun relevante sira, inklui autoridade lokál sira.
S.E Vise-Primeiru-Ministru no Primeiru-Ministru Ezersísiu akresenta, parte hotu tenke iha komitmentu ou kompromisu, koordenasaun ne’ebé di’ak, deside ekipa ida ne’ebé MOP rasik mak sei sai Prezidente ba grupu interministeriá ida ne’e no ministériu relevante sira mak sei sai ou transforma ba membru, hafoin sei kria diploma ida, hodi regulariza ekipa ne’e. Alende ne’e, planu sira tenke sinkroniza ho di’ak, atu nune’e bele implementa servisu refere ho di’ak, hodi fornese bee ba ema hotu.
Partisipa iha reuniaun ne’e mai hosi MOP no BTL, E.P rasik, Vise-Ministru Administrasaun Estatál (MAE), Vise-Minsitru Saúde (MS), reprezentante hosi Ministériu Edukasaun (ME), Ministériu Agrikultura, Pekuáriu, Peska no Floresta (MAPPF), Ministériu Ensinu Superior, Siénsia no Kultura (MESCC, sigla portugés), Ministériu Petróleu no Rekursu Minerál (MPRM), Ministériu Planeamentu no Investimentu Estratéjiku (MPIE), Sekretáriu Estadu Eletrisidade, Bee no Saneamentu (SEEAS, sigla portugés), Prezidente Autoridade Munisípiu Díli (PAM-Díli) no no parte seguransa PNTL Munisípiu Díli.
Share on Social Media:
