Díli, 27/09/2022, I Vise-Prezidente Komisaun Ezekutiva (K.E) Bee Timor-Leste, Empreza Públika (BTL, E.P), Sr. Gustavo da Cruz, akompaña hosi Jestór Departamentu Kontrolu Kualidade no Ambiente (DCQA, sigla protugés), Sr. Hipólito Amaral Ximenes, ne’ebé reprezenta BTL, E.P hodi simu Sertifikadu Lisensiamentu Ambientál, ne’ebé atribui hosi Autoridade Nasionál Lisensiamentu Ambientál, Intitutu Públiku (ANLA, I.P), ne’ebé entrega diretamente hosi Sekretáriu Estadu Ambiente (SEA), S.E Sr. Demétrio do Amaral de Carvalho.
Sertifikadu Lisensa Ambientál ne’ebé ANLA, I.P atribui ba BTL, E.P ne’e kona-bá projetu Water Supply System ba munisípiu rua hanesan munisípiu Baucau no Lautém. No seremónia atribuisaun sertifikadu ne’e rasik organiza hosi ANLA, I.P, ne’ebé realiza iha edifísiu ANLA, I.P Acait, Díli.
Molok atribui sertifikadu lisensiamentu ambientál ne’e, iha intervensaun, Sekretáriu Estadu Ambiente (SEA), S.E Demétrio do Amaral de Carvalho hatete, Sertifikadu Lisensiamentu Ambientál ne’e, hanesan padraun ou matadalan ida, hodi utiliza nune’e bele minimiza risku ambientál, wainhira implementa projetu ou investimentu sira, iha territóriu nasionál.
“Lisensiamentu ambientál hanesan parámetru ou padraun ida ne’ebé ita utiliza hodi garante dezenvolvimentu iha ita nia rain ne’e, nune’e atu hasees ka minimiza risku ambientál sira. Difísil teb-tebes ita atu halo risku ne’e sai zero, tamba ne’e iha lisensa ambientál, iha padraun balun ne’ebé ita atribui mos kondisaun sira, ita bolu offset, ou dezlokamentu hanesan estragus ou danos iha fatin ruma, ita tau kondisaun ba empreza atu hadi’a fatin seluk hodi offset fatin ne’ebé estraga ona. Dala ida tan, lisensa ambientál hanesan ita boot sira-nia “sim”, ne’ebé ohin entidade 29 hanesan titulár, ita boot sira ohin simu ona “sim” ou lisensiamentu ambientál ho kategoria B no C, ita boot sira mak tenke haree kondisaun sira, se lae orsida mosu problema ambientál, ita boot sira dehan fali ida ne’e Autoridade ambientál mak kontribui ba estragus ba ambientál sira, ne’e lae, sertifikadu lisensa iha ona ita boot sira-nia liman, ita boot sira mak atu haree kondisaun sira, nune’e hodi evita problema ambientál. Ikus liu, hodi Autoridade ANLA no SEA nia naran, ami hotu fó parabens ba titulár sira no dezejo susesu iha ita boot sira-nia servisu no ita hotu bele kontribui ba salva guarda ambiente ne’ebé furak liu iha Timor-Leste (TL)”, hatete SEA
Iha biban ne’e mos, Sekretáriu Ezekutivu Interinu ANLA, I.P, António Lelo Taci hatete, ohin sei atribui lisensa ambienta 29 ba titulár projetu sira ho kategoria rua, nune’e titulár projetu sira bele kontinua hakat ba faze tuir mai no ANLA, I.P, mos husu ba titutár projetu sira wainhira atu hakat ba implementa projetu sira, atu informa mos ba ANLA, I.P, hodi bele introduz kondisaun lisensa ne’e ba kontratór sira, atu nune’e bele garante projetu ne’e.
“Lisensa ne’ebé mak atu distribui ba ohin loron nian, hamutuk 29, lisensa ne’ebé kategoria B iha 6 kategoria C iha 23 lisensa ne’ebé mak atu distribui, ikus liu atu hatete ba titulár projetu sira liu-liu projetu governu sira hanesan ponte, estrada no bee, ami husu se bele, wainhira projetu ne’e atu implementa, halo favór atu fó hatene mos ba Autoridade ANLA atu ami hamutuk ho MOP, ita introduz kona-bá kondisaun lisensa ne’e ba kontratór sira, tamba dala barak iha faze monitorizasaun, ita nia kontratór sira, la’ós hot-hotu, maibé dalaruma sira ladun tau atensaun ba kondisaun lisensa ne’ebé mak iha, ne’ebé antes projetu ne’e atu implementa atu konvida mos ANLA, hodi bá hanesan fó formasaun ida kona-bá kondisaun lisensa, atu nune’e para ita tau matan hamutuk ba projetu ne’e to’o ninia finalidade”, dehan Sekretáriu Ezekutivu Interinu ANLA, I.P,
Sekretáriu Ezekutivu Interinu ANLA, I.P akresenta, Atu lisensiamentu ambientál ba projetu governu nomos projetu privada sira, la’o di’ak, presiza iha komunikasaun di’ak entre titulár projetu no Autoridade ANLA, I.P nian, wainhira iha atrazu ba tratamentu lisensa ambientál sira, husu atu informa ba ANLA, I.P hodi haree hamutuk hodi rezolve dezafiu ou problema ne’ebé mak iha, hodi aselera ba tratamentu lisensiamentu ambientál refere.
Alende ne’e, I Vise-Prezidente K.E BTL, E.P agradese ba esforsu no apoia tomak hosi ANLA, I.P no Sekretáriu Estadu Ambiente, nune’e ohin bele atribui ona sertikadu ba titular projetu sira no BTL, E.P husu atu mantein nafatin kooperasaun servisu iha futuru.
“Ohin ita hetan ona atribuisaun sertifikadu ba lisensiamentu ambientál ami nia agradese wa’in ba ANLA ho esforsu tomak no apoiu polítiku hosi S.E Sekretáriu Estadu Ambiente ba prosesu sira, ami orgullu, liu-liu iha BTL, E.P ami iha kooperasaun ne’ebé di’ak tebes ho ANLA atribui ona sertifikadu haat mai ami, iha servisu balun sei tuir, maibé ida ne’e hanesan guiaun ida ou matadalan ida, liu-liu iha parte kooperasaun ba atu hetan lisensiamentu ambientál nudár rekezitu báziku ba iha projetu na’in, hodi bele konvense ita nia donator sira ne’ebé mak fó ona apoiu orsamentu bai ta hodi halo investimentu iha setór hot-hotu, liu-liu iha setór bee, saneamentu no drenajen sira. Tamba ne’e, dala ida tan, hodi empreza BTL nia naran, ami hato’o agrese wa’in ba esforsu tomak, no ami husu atu ita-nia servisu hamutuk ida ne’e, kontinua mantein di’ak liu, atu nune’e ami-nia projetu sira sei tuir tan mai bele hetan no tuir la’o tuir prosesu ida ne’ebé di’ak”, informa I Vise-Prezidente K.E BTL, E.P.
Entidade sira ne’ebé mak partisipa iha seremónia atribuisaun sertifikadu lisensiamentu ambientál ne’e, mai hosi SEA, Ministériu Obras Públikas (MOP), BTL, E.P rasik, titulár projetu sira seluk nomos ANLA, I.P.
Share on Social Media:
