Ermera, 15/05/2024, Diretór Diresaun Engeñaria no Investimentu BTL, E.P, João da Cruz Cardoso, Jestór Infraestrutura BTL, E.P, partisipa iha sosializasaun, kona-bá projetu sira, ne’ebé tama iha faze planeamentu no implementa iha Postu Administrativu Atsabe, Munsípiu Ermera, atividade sosializasaun ne’e, organiza husi Administradór Postu Administrativu Atsabe, ne’ebé realiza ona iha loron 10 fulan maio 2024.
Iha sosializasaun ne’e mos ko’alia kona-bá projetu melloramentu sistema bee moos iha Kapitál Postu Administrativu Atsabe, ne’ebé atu kanaliza rekursu husi Bee Matan Ergina no Anilaba,maibé projetu ida ne’e dadaun ne’e paradu, tamba hetan impedimentu hosi autoridade lokál Atara.
Razaun Xefe Suku Atara la autoriza BTL, E.P atu kanaliza bee husi Bee Matan Anilaba, tamba komunidade Suku 5, asesu bee husi bee matan ne’e rasik. Wainhira projetu ne’e foti rekursu bee ida ne’e, ba futuru sei fo impaktu ba nia populasaun.
Molok too iha faze implementasaun projetu ida ne’e, liu hosi prosesu naruk ida, maka identifika bee matan Anilaba rasik, hetan akompanamentu hosi autoridade lokál hamutuk ho engeñeiru BTL, E.P halo levantamentu dadus, maibé ikus impede obra ida ne’e. Tuir esplikasaun tékniku katak, maske BTL, E.P foti rekursu bee ne’e, maibé bee ne’ebé abitante husi Suku 5 refere, sei garante nafatin bee sufisiente, hodi utiliza ba nesesidade loron-loron no bele mos kanaliza balun mai iha postu Administrativu Atsabe, atu bele responde mos ba komunidade sira nia preokupasaun liu-liu liga ba bee moos.
Ho problema sosiál ida ne’e Diretór DEI husu ba autoridade lokál, oinsa bee fo solusaun ba kestaun ida ne’e, maibé Xefe Atara kontinua mantein nia pozisaun, hodi labele kanaliza bee husi Bee Matan Anilaba, maibé Lider Komunitária ne’e mos rekomenda katak, bele foti fali rekursu bee, ne’ebé lokaliza iha Bee matan Anilaba nia okos.
Relativamente ho problema sosiál iha Postu Administrativu Atsabe ne’e, BTL, E.P sei hare kestaun ne’e didi’ak, maka foin bele hola desizaun.
Iha atividade sosializasaun ne’e, Sekretáriu Assuntu Sosiál no Sekretária Assuntu Administrasaun & Financas Munisípiu Ermera, Koordenadór BTL-EP Ermera, Diretór MOP Munisípiu Ermera, Komandante PNTL Esquadra Postu Administrativu Atsabe no Xefi Suku 12.
Share on Social Media:
