Bobonaro, 30/05/2023. Diretór DOM, Sr. Aleixo dos Santos reprezenta Bee Timor-Leste, Empreza Públika (BTL, E.P) partisipa iha seremónia inaugurasaun sistema bee moos, ne'ebé realiza iha aldeia Faloai, suku Leohitu, Postu-administrativu Balibo, munisípiu Bobonaro.
Projetu sistema bee moos ne'e benefisia ba komunidade uma kain 96 ho totál populasaun 344 ne'ebé hela iha aldeia Faloai, suku Leohitu.
Projetu bee moos refere implementa hosi cruz Vermelha Timor-Leste (CVTL) no fundus mai hosi Servisu Apoiu Sosiedade Sivil no Auditoria Sosiál iha Gabinete Primeiru Ministru (SASCAS, sigla portugés) ho montante dólar Amerikanu rihun 20 resin ($ 23 mil). Sistema bee ne'e gravitasaun iha ne'ebé kanaliza bee hosi mota to'o iha aldeia Faloai ho distánsia metru 4,450 (4,450m). Alende ne'e, harii tanke tolu no instala mos torneira hitu, nune'e bele hakmaan ona populasaun sira nia preokupasaun durante ne'e.
Prosesu kanalizasaun ne'e lori tempu lubuk ida, maibé konsege finaliza no ohin bele inaugura hodi entrega ofisialmente ba autoridade lokál no populasaun sira ne'ebé hela iha suku Leohitu, atu bele jere rasik sistema ne'e, maibé SMASA & BTL, E.P nafatin apoia, hodi asegura sistema refere. Alende ne'e, kuida ou tau matan didi'ak ba sistema sira, nune'e sistema refere bele dura nafatin to'o tempu naruk, atu bele kontinua fornese bee ba komunidade sira.
Fahe ba Sosial Media:
