Díli, 02/12/2024. Vise-Prezidente Bee Timor-Leste, Empreza Públika (BTL, E.P) ba Asuntu Tékniku, Sr. José Filipe Ximenes Smith, akompaña hosi Diretór Operasaun no Manutensaun (DOM) BTL, E.P, Diretór Enjeñaria no Investimentu (DEI) BTL, E.P, Jestór Infraestrutura ho tékniku zona 6-9 halo monitorizasaun ba sistema bee, iha Becora, postu-administrativu Cristo Rei, munisípiu Díli.
Atividade monitorizasaun ne’e, hodi observa direta servisu fíziku iha terrenu, liu-liu tékniku hosi kompañia Vitarly ne’ebé halo hela servisu manutensaun ba sistema bomba iha estasaun bomba merkadu Becora/Becora Temporal.
Hafoin remata iha Becora, ekipa ne’ebé lidera hosi Vise-Prezidente KE BTL, E.P ba Asuntu Tékniku ne’e, kontinua hasoru malu hho Autoridade postu-administrativu Cristo Rei, xefe suku Camea, hodi ko’alia kona-bá atividade sosializasaun iha Becora no Camea, nomos husu ba Autoridade no lideransa suku no aldeia sira, atu servisu hamutuk ho BTL, E.P hodi identifika komunidade sira ne’ebé halo koneksaun ilegál iha PA Cristo Rei nian, hodi bele desliga no tenke bá rejista iha balkaun BTL, E.P, nune’e tékniku sira bele tun ba halo ligasaun tuir padraun BTL, E.P nian.
Iha okaziaun ne’e, parte BTL, E.P informa mos kona-bá BTL, E.P sei halo perfurasaun bee foun iha Becora nian, tanba ne’e husu ba autoridade postu no lideransa suku Camea, atu koopera ho ekipa BTL, E.P, nune’e bele identifika fatin/rai iha Becora Temporal, hodi halo perfurasaun foun iha área refere, atu nune’e hodi reforsa tan sistema bee ezistente sira iha parte Becora nian, hodi fornese bee moos ba abitante sira.
Hafoin rona tiha informasaun hosi BTL, E.P, Administradór PA Cristo Rei no xefe suku Camea prontu koopera ho BTL, E.P hodi realiza servsiu hirak ne’e.
Iha biban ne’e, observa mos sistema bomba iha estasaun Camea no xefe aldeia Has-Laran hasoru mos Ezekutivu ho ekipa BTL, E.P nian, hodi hato’o problema bee moos ne’ebé abitante sira enfrenta.
Share on Social Media:
