Díli, 28/03/2023, Prezidente Komisaun Ezekutiva (K.E) Bee Timor-Leste, Empreza Públika (BTL, E.P), Eng. Carlos Peloi dos Reis ohin simu vizita kortejia hosi ekipa Ajénsia Mott MacDonald-Fleming Fund South East Asia Regional liuhosi Menzies School of Health Research iha Timor-Leste ne’ebé hala’o vizita traballu mai Timor-Leste (TL), hodi observa no halo monitorizasaun ba implementasaun Fleming Fund nian. Nune’e ekipa ne’e hakarak vizita no ko’alia ho Prezidente KE BTL, E.P nian. Enkontru ne’e, hala’o iha sala reunaiun ezekutivu, edifísiu sentrál BTL, E.P, Caicoli, Díli.
Objetivu hosi vizita ne’e, hodi diskute kona-bá susesu Fleming Fund faze I no introduz Fleming Fund faze II nian.
Hafoin enkontru ekipa relata, Fleming Fund preokupa ho transmisaun hosi anti-mikróbiu iha nasaun dezenvolvidu sira no problema antibiótiku ne'ebé la funsiona ou rezisténsia antimikróbiu, ida ne’e hanesan problema boot no Fleming Fund tenta hodi entende eskopu hosi problema ne’e rasik no nia problema sériu ne’e iha parte ne’ebé. Atu nune’e bele apoia komunidade no governu hodi ultrapasa problema refere, liuhosi sistema foun, ferramenta no treinamentu foun ba pesoál ou entidade sira. Em termos fó apoiu hodi kapasita laboratóriu atu halo teste ba amostra rai no bee nomos apoiu fortalesimentu ospitál no servisu veterinária no fatin seluk ne’ebé hala’o ona teste mikróbiu, nune’e atu bele entende kestaun refere.
Ho introdusaun servisu hirak ne’e, parte BTL, E.P apresia no iha feadback ne’ebé pozitiva, kona-bá posibilidade hodi ampliar/habelár monitorizasaun ne’ebé hala’o ona iha sistema bee.
Ho nune’e iha reuniaun ohin hahú ko’alia oinsá atu haree mos ba problema ida ne’e iha ambiente. Portantu, ida ne’e hanesan pasu di’ak ida hodi eleva servisu importante ne’ebé realiza ona iha tinan hirak ne’e, liuhosi parseria ho governu TL, hodi hadi’a sistema ba ema, saúde no saneamentu.
Fahe ba Sosial Media:
